VOV4.Jarai - Čơtlăm mơmot lơ 1/7, ơi Nguyễn Chí Dũng, Ding kơna Grŭp mă bruă Ping gah dêh čar, Khua Ding jum kơčăo bruă hăng tuh pơplai, hăng ơi Nguyễn Hồng Diên, Ding kơna Grŭp mă bruă Ping gah dêh čar, Khua Ding jum sĭ mơdrô, hrom hăng grŭp khua mua hyu mă bruă mơng Ping gah kơnuk kơna hmâo laih tal nao čuă hăng mă bruă ƀơi tơring čar Daknông kơ bruă ngă tui Tơlơi pơtrun pơsit hăng Klah čun mơng Ding jum kơđi čar kơ pơđĭ kyar bơwih ƀong – mơnuih mơnam, pơhlôm pơgang lŏn ia, rơnuk rơnua plơi pla kual Dăp Kơdư.

Klah čun mông mă bruă, Khua Ding jum kơčăo bruă hăng tuh pơplai Nguyễn Chí Dũng đĭ pơhiăp, Daknông phun ñu hmâo laih lu bôh tơhnal yôm phăn bơhmu hăng tơhnal ba tơbiă mơng tơlơi pơtrun pơsit; glông bruă kơđi čar, tơlơi rơnuk rơnua hơđong hăng djă pioh kơjăp; tơlơi hơdip mơda, pran jua mơng mơnuih ƀôn sang, biă ñu lĕ kual neh wa djuai ania ƀiă jai hrơi jai dưi pơđĭ dlông. Ơi Nguyễn Chí Dũng lăi rơđah, Daknông khom pơtrut tañ rơnoh pơkă kual tơring čar, kiăo tui rơwang pơkă jơlan gah pơđĭ kyar mơng kơnuk kơna hăng hơdôm ding jum, gơnong bruă hmâo lăi pơthâo kiăng pơhlôm anô̆ kơjăp hăng pơđĭ kyar djơ̆ jơlan gah tañ ngă brơi Daknông pơđĭ kyar tañ, kơjăp phik./.

Siu H’ Prăk: Pơblang