VOV4.Jarai-Tlam lơ 7/3, ƀơi Hà Nội, Ping gah kông an, Ding jum kông an jơnum Hơdră hơdor glăi 112 thun hrơi jar kmar pioh kơ ƀing đah kơmơi hrơi lơ 8/3/1910-8/3/2022 laih anun jơnum bưp ƀing khua mua tơhan kông an, nao jơnum ruah khua pơ ala đah kơmơi đơ đam dêh čar tal XIII. Pơhiăp ƀơi mông jơnum, Khua ding jum kông an ơi Tô Lâm lăi rơđah, ping gah kông an, khua mua ding jum kông an dêh čar đăo kơnang na nao hăng čang rơmang, djop gưl đah kơmơi amăng tơhan kông an ăt ngă bruă hơdeč hmar, pơblih phrâo, đăo kơnang kjăp amăng djop bruă mă, pơtrut tui pơkơtưn nao rai amăng bruă mă.

Rơđah biă mă ñu hăng lu hơdră, hơbô̆ bruă, lir hơbit hăng bruă mă djơ̆ găl phara kơ tơhan kông an; ngă tui klă bruă lăi pơthâo djru pơgang tơlơi thâo rơgơi, hiam klă kơ ƀing đah kơmơi. Khua ding jum ơi Tô Lâm čang rơmang, rĭm khua mua, mơnuih apăn bruă, khul đah kơmơi mut phung kiăng thâo hluh tong ten tơlơi gơgrong ba, bruă mă, tơlơi kiăng ngă, anăp mă bruă, hur har, gum pơgôp ngă hrom amăng khul, ngă tui klă hơdôm bruă mă amăng khul đah kơmơi hrơi, djru nao rai hrăm ngă kjăp tui hăng tong ten, kjăp amăng pran jua pô.

Nay Jek: Pơblang