Khua ding jum Kông an ơi Tô Lâm hăng grup khua mua nao čuă, tơña bla sang anŏ tơhan djai hơmâo: Thiếu tá Hòang Trung (tơkeng thun 1981), Đại uý Nguyễn Đăng Nhân (tơkeng thun 1994) mơnuih mă bruă amăng Kông an să Ea Ktur; Thiếu tá Trần Quốc Thắng (tơkeng thun 1989) hăng Đại uý Hà Tuấn Anh (tơkeng thun 1991), mă bruă amăng Kông an să Ea Tiêu; Khua git gai Ping gah, Khua Jơnum min pơ ala mơnuih ƀôn sang să Ea Ktur ơi Nguyễn Văn Kiên hăng Khua Jơnum min mơnuih ƀôn sang să Ea Tiêu ơi Nguyễn Văn Dũng. Ƀơi sang anŏ tơhan djai pơsăn drơi, Khua ding jum ơi Tô Lâm hăng ƀing khua hơmâo tŭi ñang hơ-ŭ kơ ling tơhan, ƀing khua djai yua wai lăng tơlơi rơnuk rơnua kơ mơnuih ƀôn sang. Thâo pap kơ tơlơi truh rơngôt sot tom sang anŏ hơmâo ling tơhan, khua mua djai, ơi Tô Lâm pơsit, Ping gah, Kơnuk kơna, Ding jum kông an lêng kơ lăng ba, djru brơi hăng ling tơhan kông an djai. Khua ding jum ơi Tô Lâm kiăng hơdôm anom bruă tơring čar Dak Lăk djru ba tơlơi hơdip mơda, čuă jơmư sang anŏ tơhan djai pơsăn drơi. Ƀu pioh sang anŏ tơhan djai pơsăn drơi kơƀah, tơnap tap ôh.

Ƀrô hrơi nao čuă jơmư, juh alum sang anŏ tơhan djai pơsăn drơi jăn kơ lŏn ia, Khua ding jum ơi Tô Lâm brơi 500 klăk prăk man pơkra sang dŏ brơi 2 boh sang tơhan anun lĕ Thiếu tá Hoàng Trung hăng Thiếu tá Trần Quốc Thắng; brơi hră pơkom prăk hơmâo 500 klăk kơ sang anŏ tơhan djai pơsăn drơi Nguyễn Đăng Nhân hăng Hà Tuấn Anh; brơi 50 klăk prăk kơ hơdôm boh sang anŏ tơhan djai, hơmâo mă mơ̆ng keh prăk Pơkơdong mơnuih ngă soh Dêh čar ta.