VOV4.Jarai - Tlam lơ 2/6, ƀơi Hà Nội, Đại tướng Tô Lâm, Khua ding jum kông an hơmâo tŭ jum ơi Shawn Perry Steil, Khua anih jưh pơ ala dêh čar Canada phrâo ƀơi Việt Nam, nao bưp, mă tơngan amăng hrơi mông ñu rai mă bruă ƀơi Việt Nam. Bơni hơ-ơč kơ ơi Shawn Perry Steil gơgrong bruă phrâo ƀơi Việt Nam, Khua ding jum ơi Tô Lâm brơi thâo tơlơi rô nao rai Việt Nam - Canada pơđĭ kyar hơđong, hơmâo ngă hơdôm tơlơi klă hiam amăng abih bang bruă kơđi čar - pơtom hiăp, sĭ mơdrô - tuh pơ plai, ngă hrŏm pơđĭ kyar, rơnuk rơnua lŏn ia, gru grua - pơtô hrăm, boh thâo măi mok, jơnum pơbưp mơnuih ƀon sang.

Khua ding jum ơi Tô Lâm kiăng amăng hrơi blan pơ anăp, Khua anih jưh pơ ala Canada ƀơi Việt Nam lăng ba pơtrut tui hloh tơlơi rô nao rai kơplah wah Ding jum Kông ang Việt Nam hăng Ding jum rơnuk rơnua Canada, tơhan pôlih mơng Kơnuk kơna ơi pơtao Canada hăng hơdôm glông ngă hrŏm dua bơnah, lu bơnah đah mơng bơlăi nao rai tơlơi pơhing bơwih brơi bruă pơgang, pơgăn mơnuih ngă soh, hơduah ĕp, pơsir hĭ kơđi tơlơi.

Siu H’Mai: Pơblang