VOV4.Jarai - Tlam lơ 29/3, ƀơi Hà Nội, Đại tướng Tô Lâm, Khua ding jum kông an tŭ jum ơi Vladimir Baravikov, Khua anih jưh phrâo pơ ala Belarus ƀơi Việt nam nao mă tơngan, pơƀuh ƀô̆ pơphun mă bruă ƀơi Việt Nam. Khua ding jum ơi Tô Lâm bơni hơ-ơč kơ Khua anih jưh amăng rơwang thun ngă bruă ƀơi Việt Nam truh kih, pơtrut tui tơlơi rô nao rai dua bơnah kơtang hloh; čang rơmang khua anih jưh amra dong yua hăng pơtruh brơi, pok prong tơlơi ngă hrŏm kơplah wah Ding jum kông an Việt Nam hăng hơdôm anom bruă bơdjơ̆ nao mơng Belarus. Khua ding jum ơi Tô Lâm lăi, amăng hơdôm thun rơgao, tơlơi rô nao rai dua bơnah gah kơđi čar, bơwih bong, boh thâo gru grua, mơnuih mơnam, rơnuk rơnua, ling tơhan đĭ kyar na nao, hơkrŭ tui na nao; rơkâo dua bơnah ngă hrŏm kơjăp hloh dong hăng djru nao rai amăng mông jơnum jar kmar amăng blan pơ anăp, gum djă bong tơlơi rơngai, hơđong kơjăp amăng kual hăng ƀơi rŏng lŏn tơnah.

Siu H’Mai: Pơblang