Amăng mông bưp, Khua ding jum ơi Lương Tam Quang lăng yôm tơlơi gơgrong, tơlơi gum pơgôp mơng Khua anih jưh amăng bruă pơtrut tơlơi rô nao rai kơplah wah dêh čar Australia-Việt Nam, sit biă ñu lĕ bruă hơkrŭ tơlơi rô nao rai ngă hrŏm djop mơta  amăng tal nao čuă dêh čar Australia mơng Khua dêh čar ơi Phạm Minh Chính amăng blan 3 laih rơgao.

Kiăng tŏ tui pơtrut tơlơi rô nao rai ngă hrŏm kơplah wah Ding jum kông ang hăng hơdôm anom bruă phiah phiăn Australia, Khua ding jum ơi Lương Tam Quang rơkâo dua bơnah tŏ tui ngă tui, pok pơhai ngă hrŏm amăng bruă wai pơgang rơnuk rơnua, pơgăn ƀing ngă soh amăng plang internet. Tŏ tui pơlăi nao rai bruă pơgăn ƀing ngă soh đuăi nao rai djop dêh čar, wai lăng mơnuih mut nao rai lŏn ia, pơlăi nao rai bruă pơgăn mơnuih mut nao rai ča čot kiăng pơhlôm hơđong ƀơi rĭm boh dêh čar.