Amăng tal nao čuă sit nik dêh čar India, Khua tơhan krên dên Đại tướng ơi Phan Văn Giang, Ding kơna Ding jum kơđi čar, Kơ-iăng khua git gai Ping gah Ling tơhan, Khua ding jum ling tơhan ba jơlan grup khua mua mơ̆ng Ding jum ling tơhan Việt Nam nao mă tơngan Khua mir sir dêh čar India, yă Droupali Murmu ƀơi plơi prong jưh jom New Delhi. Pơhiăp ƀơi mông bưp, Khua ding jum ơi Phan Văn Giang pơsit, dêh čar Việt Nam lêng kơ lăng yôm bruă hơkrŭ kơjăp hăng pơđĭ tui tơlơi rô nao rai mơ̆ng đưm hlâo, ngă hrŏm abih bang hăng dêh čar India hơmâo laih Khua mir sir Hồ Chí Minh hăng Khua dêh čar Jawaharlal Nehru akŏ pơjing laih anun hơmâo djŏp rơnuk khua mua, mơnuih ƀôn sang dua bơnah bơbuă tui.

Khua mir sir dêh čar India pơsit tal čuă jơmư anai amra ngă kơjăp hloh tơlơi rô nao rai ngă gŏp amăng abih bang bruă. Lăng yôm boh than hơmâo ngă amăng mông bơkơtuai kơplah wah dua čô Khua ding jum ling tơhan, Khua mir sir dêh čar India pơsit, tơlơi rô nao rai bruă ling tơhan dua bơnah jai hrơi pơđĭ kyar tui hloh, ngă hrŏm sit nik, tŭ yua, gum pơgôp prong biă amăng tơlơi rô nao rai kơplah wah dua bơnah.