VOV4.Jarai-Tlam lơ 15/7, ƀơi plơi prong Đà Lạt, Khua ding jum Man pơphô hăng tuh pơ alin, ơi Nguyễn Chí Dũng hrom hăng gup hyu mă bruă hơmâo nao mă bruă hăng tơring čar Lâm Đồng. Mông mă bruă pơtum lăng nao boh tơhnal ngă tui 20 thun Hră pơtrun mrô 10 hăng 10 thun ngă tui Hră klah čun mrô 12 mơ̆ng Ding jum kơđi čar pok pơhai ƀơi tơring čar anai. Mơ̆ng anun brơi ƀuh, tơlơi bơwih ƀong huă mơ̆ng Lâm Đồng hơmâo tơlơi pơđĭ kyar lu hăng tŭ yua biă mă.

Khua ding jum Man pơphô hăng Tuh pơ alin mă bruă ƀơi Lâm Đồng

Hnong pơđĭ kyar bơwih ƀong huă dưi ngă rơbêh 10%; prăk pơhrui glăi duh jia truh 504 klai prăk thun 2002 đĭ truh 11 rơbâo klai prăk thun 2021; rơnoh prăk tuh pơ alin amăng abih bang mơnuih mơnam tơring čar thun 2021 truh kơ 27 rơbâo 365 klai prăk, đĭ hloh 19 wơ̆t pơkă hăng thun 2002. Hrom hăng anun, pran mă bruă pơhno mơ̆ng tơlơi bơwih ƀong huă đĭ kơtang, jơlan glông nao rai ăt pơkra hiam tui na nao, pơblih phrâo lu; ngă klă bruă lui rơmŏn kŏn rin, pơhlôm bruă mă pơgang hơđong tơlơi hơdip mơda mơnuih ƀôn sang; pơgang kơđi čar hơđong kjăp laih anun tơlơi rơnuk rơnua kơ mơnuih mơnam ăt tong ten.

Nay Jek: Pơblang