VOV4.Jarai - Ƀơi Ƀirô mă bruă, Khua ding jum pơtom hiăp dêh čar ơi Bùi Thanh Sơn tŭ jum Kơ-iăng khua ding jum pơtom hiăp dêh čar India Saurabh Kumar ƀrô tal ñu rai čuă dêh čar Việt Nam hăng git gai jơnum bơkơtuai kơđi čar tal 12 hăng bơkơtuai bruă ngă hrŏm pơ anăp tal 9 kơplah wah Ding jum pơtom hiăp dua boh dêh čar dong mơng lơ 29-31/5/2022. Amăng mông bưp, Khua ding jum ơi Bùi Thanh Sơn rơkâo dua bơnah tŏ tui gum hrŏm pơtrut hơdôm bruă ngă hrŏm phun anun lĕ: kơđi čar - pơtom hiăp, ling tơhan - wai pơgang rơnuk rơnua, boh thâo phrâo, gru grua hăng pơbưp nao rai mơnuih ƀon sang dua bơnah, sit biă ñu pơtrut ngă hrŏm amăng bơwih brơi tuai čuă ngui amăng hrơi blan glăk pok glăi bah amăng jang hăng pơphun lu bruă yôm phăn pioh hơdor glăi 50 thun hrơi akŏ pơjing bruă pơtom hiăp (1972-2022). Kơ-iăng Khua ding jum pơtom hiăp India pơsit tong India lêng kơ lăng Việt Nam lĕ akŏ phun amăng hơdră “Ngă bruă anăp nao kual Ngŏ”, laih dong ƀuăn gum hrŏm hăng Việt Nam pơtrut ngă hrŏm djop mơta pơ anăp anai.

Siu Đoan: Pơblang