Tơdơi kơ hmư̆ khua mua git gai tơring čar Dak Lak lăi pơthâo tơlơi pơhing rơđah rơđong kơ bruă ngă rung răng mlam mơguah lơ 11/6, jing bruă ngă soh sat răm ƀăm, ngă rung răng ƀơi tơring glông Čư̆ Kuin, tơring čar Dak Lak, jing bruă ngă soh sat pirat pơdjai mơnuih, ngă rung răng kơtang biă mă, hơmâo tơpuôl, khin hơtai soh sat biă mă. Ding jum kông an git gai lu anom bruă tơhan pơphun blah glăi, kiăo mă ƀing ngă soh, laih pơpha tơhan djru mă bruă pơgang tơlơi rơnuk rơnua hăng suh mă ƀing soh sat, pioh pơgang ană plơi pla.

Khua ding jum ơi Tô Lâm lăi, truh ră anai, abih bang ƀing ngă soh hơmâo mă pơkong laih, tơlơi pơhing rơnuk rơnua glăi amăng tơring čar Dak Lak, tơlơi hơdip mơda mơnuih ƀôn sang pơwơ̆t glăi kah hăng tơđar. Khua ding jum git gai tơring čar Dak Lak pơ anăp anăm ngă amưng ôh, kiăng pơgang tong ten tơlơi rơnuk rơnua mơ̆ng plơi pla mơtam, glăm ba lu hloh amăng bruă mă pô ngă khua. Amăng bruă pơgang tơlơi rơnuk rơnua ƀơi hơdôm plơi pla phun, boh nik ñu kual Dap Kơdư, kiăng pơtrut kơtang hrŏm hăng djop sang bruă, khul ling tơhan pơhlôm, pơgang tơlơi rơnuk rơnua.

Ƀơi mông jơnum anun, Khua ding jum ơi Tô Lâm ƀơk hră apah bơni mơ̆ng Ding jum kông an brơi kơ 5 čô mơnuih ƀôn sang gum hrŏm bruă pơgang tơlơi rơnuk rơnua dêh čar, djru pơhlôm rơnuk rơnua hơđong amăng tơring čar.