VOV4.Jarai - Tlam lơ 18/8, ƀơi Hà Nội, Đại tướng Tô Lâm, Ding kơna apăn bruă Ding jum kơđi čar, Khua ding jum kông an hơmâo tŭ jum ơi Sugi Ryotaro, khua anih jưh hơđăp yôm pơ ala Japan - Việt/Việt - Japan. Ƀơi mông bưp, Khua ding jum Tô Lâm lăi Ding jum kông an čang rơmang pơtrut tui lu bruă ngă sit nik pioh hơdor lui tơlơi jơnum yôm anai hluai tui bruă pơbưp khua mua djŏp gưl, pơđĭ tui tơlơi ngă hrŏm, bơlăi nao rai tơlơi thâo amăng bruă pơkơdong glăi ƀing ngă soh, pơtô pơjuăt bruă kơ ƀing khua, pơphun brơi ƀing khua Kông an Việt Nam - Tơhan pôlih Japan nao čuă, pơbưp nao rai. Khua ding jum Tô Lâm kiăng, hăng tơlơi rô nao rai dlăm, hơmâo tơlơi kơdrưh kơ-ang prong amăng Japan, ơi Sugi Ryotaro hăng Khua anih jưh pơ ala dêh čar amra lăng ba, pơtrut brơi Kơnuk kơna, hơdôm Ding jum anom bruă pơ ala brơi gah dêh čar Japan pơđĭ hloh dong tơlơi ngă hrŏm, djru ba kơ Việt Nam.

Siu H’Mai: Pơblang