VOV4.Jarai - Tlam lơ 8/4, ƀơi Hà Nội, Đại tướng ơi Tô Lâm, Ding kơna Ding jum kơđi čar, Khua ding jum kông ang tŭ jum Trung tá Pedro Soca Pascual, Khua pơ ala Ding jum pơphun bruă Cuba ƀơi Việt Nam. Đĭ pơhiăp amăng mông bưp, Khua ding jum ơi Tô Lâm lăi pơtong, amăng thun blan laih rơgao, mah klin Covid-19 bơbeč nao kơtang hơdôm jơlan hơdră, akŏ bruă ngă hrŏm mơng dua ding jum samơ̆ dua boh dêh čar hơmâo gir run hơkrŭ glăi tơlơi ngă tơnap tap kiăng kơ pok pơhai tŭ yua sa, dua bruă yôm phun tui glông pơhiăp lăng nao rai mơng ataih hăng ƀơi anăp. Khua ding jum ơi Tô Lâm lăng yôm hơdôm boh than ba glăi mơng ngă hrŏm kơplah wah Ding jum kông ang Việt Nam hăng Ding jum pơphun bruă Cuba amăng hrơi blan laih rơgao. Kiăng kơ ngă dơlăm tui tơlơi rô nao rai ngă hrŏm kơplah wah dua ding jum, Khua ding jum ơi Tô Lâm rơkâo dua ding jum tŏ tui ngă tŭ yua hơdôm boh tơhnal ngă hrŏm tui tơlơi pơkôl ngă hrŏm kơplah wah Ding jum kông ang Việt Nam hăng Ding jum pơphun bruă Cuba hơmâo kĭ amăng blan 11/2017.

Siu Đoan: Pơblang