VOV4.Jarai - Tlam lơ 15/9, Grup hyu mă bruă mơng Ding jum pôr pơhing yua Khua ding jum ơi Nguyễn Mạnh Hùng ba jơlan hlâo hơmâo nao čuă hăng mă bruă ƀơi tơring čar Bạc Liêu kơ bruă pơplih mă yua boh thâo phrâo hăng bruă ngă tui akŏ bruă pơđĭ kyar plơi prong thâo rơgơi. Đĭ pơhiăp amăng mông mă bruă, Khua ding jum ơi Nguyễn Mạnh Hùng brơi thâo, mơng jŭ yap amăng tơring čar Bạc Liêu hơmâo giăm 30.000 boh sang anŏ ƀun rin, giăm ƀun rin aka ƀu hơmâo măi telephôn rơgơi, Ding jum amra djru brơi 15.000 boh brơi tơring čar mơng jơlan hơdră “Sóng máy tính cho em”.

Hăng 15.000 boh dŏ glăi, Ding jum jao brơi 3 anom bruă dăng kông pơprong (VinaPhone, Mobifone, Viettel) djru brơi tơring čar. Hăng hơdôm tơlơi rơkâo pơkŏn amăng tơring čar Bạc Liêu, Khua ding jum ơi Nguyễn Mạnh Hùng jao hơdôm anom bruă bơdjơ̆ nao amăng Ding jum djru, pơsir hĭ. Khua ding jum pôr pơhing ơi Nguyễn Mạnh Hùng ăt rơkâo tơring čar Bạc Liêu sem lăng pơčlah hĭ gơnong bruă gru grua, pôr pơhing, bơrơguăt drơi jăn hăng tuai čuă ngui, jing sa gơnong bruă anun lĕ gơnong bruă pôr pơhing.

Siu Đoan: Pơblang