VOV4.Jarai - Tŭ ư tơlơi jak iâu mơng Khua ding jum pơtom hiăp ơi Bùi Thanh Sơn, Khua ding jum pơtom hiăp Cộng hòa Panama Érika Mouynes pơphun rai čuă Việt Nam sit nik, mơng lơ 5 truh lơ 6/4/2022. Ƀơi sang jưh tuai Kơnuk kơna, Khua ding jum pơtom hiăp Bùi Thanh Sơn hơmâo pơhiăp tom Khua ding jum pơtom hiăp Érika Mouynes. Dua bơnah lăi pơthâo nao rai kơ tơlơi hơmâo amăng lŏn ia giăm anai, lăng glăi abih bang hăng lăi nao hơdră pơđĭ tui tơlơi ngă hrŏm gah kơđi čar, pơtom hiăp, bơwih ƀong, sĭ mơdrô, ngă hmua...ăt kah hăng ngă hrŏm ƀơi mông jơnum jar kmar hăng lu bơnah. Dua čô khua ding jum ăt čang rơmang pơtrut tui tơlơi ngă hrŏm mơng dua bơnah amăng bruă dưi đĭ kyar kah hăng pơdŭ pơgiăng gơnam tui jơlan ia rơsĭ, pơgang ayuh hyiăng pơplih, pơkra apui lơtrik phrâo...; laih dong, lăi pơthâo nao rai hăng tŭ ư pơsir tơlơi bơrơsua hăng tơlơi rơngai, kiăo tui tơlơi phiăn jar kmar.

Siu H’Mai: Pơblang