VOV4.Jarai - Ƀơi Ƀirô mă bruă, Khua ding jum pơtom hiăp dêh čar ta ơi Bùi Thanh Sơn bưp Kơ-iăng Khua tal 1 Ding jum pơtom hiăp dêh čar Mi, yă Wendy Sherman ƀrô tal ñu rai čuă dêh čar Việt Nam dong mơng lơ 10-13/6/2022. Amăng mông bưp, Khua ding jum lăi pơtong dêh čar Việt Nam lăng Mi lĕ sa amăng hơdôm dêh čar ngă hrŏm prong hloh; amra hrŏm hăng dêh čar Mi pơtrut tơlơi rô nao rai ngă hrŏm djop mơta hăng jai dơlăm tui, tŭ yua, sit nik tui jơlan lăng yôm tơlơi rơngai, ngă pô, rơnuk rơnua lŏn ia hăng hơdră bruă kơđi čar dua bơnah. Dua čô khua ăt pơčrông sai hơdôm hơdră bruă tong ten kiăng pơtrut ngă hrŏm amăng djop bruă anun lĕ mông pơbưp nao rai khua mua, pơgang klin kheng, hơkrŭ glăi bơwih ƀong huă - mơnuih mơnam tơdơi kơ abih klin, pơlăi nao rai bruă sĭ mơdrô - tuh pơ alin, rŭ pơkra ming hơdôm anŏ sat răm mơng rơnuk blah wang pioh glăi, laih dong bruă man pơdong anom bruă pơ ala dêh čar. Dua bơnah ăt bơkơtuai kơ bruă amăng jar kmar hăng amăng kual dua bơnah đing nao anun lĕ hơdôm tơlơi pơčeh tô nao rai kual Asia - Thái Bình Dương hăng Ấn Độ Dương, bruă ƀơi kual ia rơsĭ Ngŏ, pơđĭ kyar hơđong hăng kơtưn ngă hrŏm amăng pơtô pơjuăt ƀơi kual Mekong, blah ngă kơplah wah Nga - Ukraine.

Siu Đoan: Pơblang