Tŭ ư tơlơi jak iâu mơ̆ng Khua ding jum kual Mi kô̆ hăng Khua ding jum pơtom hiăp dêh čar Prang, yă Catherine Colonna, Khua ding jum pơtom hiăp dêh čar Việt Nam ơi Bùi Thanh Sơn nao čuă sit nik dêh čar Prang mơ̆ng lơ 5-6/6/2023. Ƀơi mông bơkơtuai nao rai lơ 5/6, ơi Bùi Thanh Sơn lăi, Việt Nam lăng yôm na ao bruă ngă giăng mah hăng dêh čar Prang, ding kơna yôm biă mă amăng kual EU, jing bơnah ngă hrom tong ten mơ̆ng Việt Nam hăng lu gru grua ngă hrom mơ̆ng đưm, djru hrom čih pioh gru phun, gru grua hiam, ană mơnuih.

Khua ding jum ơi Bùi Thanh Sơn rơkâo Kơnuk kơna dêh čar Prang dong yua, pơtrut ƀing pơ ala mơnuih ƀôn sang dêh čar tañ pơsit hĭ hră pơkôl Pơgang bruă tuh pơ alin Việt Nam-EU (EVIPA), pơtrut jơnum min kual Mi kô̆ EC tañ lui hĭ hră jăm ƀuah jing kak kơñĭ IUU mơ̆ng EC hăng gơnam sĭ mơdrô mơnong akan hơdang Việt Nam. Dua čô khua ding jum pơtom hiăp ăt pơčrong sai kơ bruă mă amăng kual, jar kmar dua bơnah bơ đing nao, ăt lăi pơtong, ngă hrom tong ten hloh laih anun dong yua nao rai tơdruă amăng anom bruă, jơnum prong lu bơnah ƀơi jar kmar, boh nik ñu Sang gum hơbit djop dêh čar hăng pơtrut bơnah ngă hrom yôm ASEAN-EU.