VOV4.Jarai - Mơmot lơ 17/8, Ping gah, Gong gai phường Quán Thánh, quận Ba Đình, ƀôn prong Hà Nội pơphun “Hrơi jơnum abih bang mơnuih ƀôn sang pơgang rơnuk rơnua plơi pla lŏn ia”. Đại tướng Tô Lâm Khua Ding jum kông ang nao pơhmư̆ hăng đĭ pơhiăp amăng mông jơnum. 17 thun rơgao, "Hrơi jơnum abih bang mơnuih ƀôn sang pơgang rơnuk rơnua plơi pla lŏn ia" mơng phường Quán Thánh hmâo pok pơhai hăng lu bôh yôm lu mơta, sit nik, ba glăi bôh tơhnal hăng hmâo pran lar hyu prong, mơng anun ngă tui pran kơtang mơng abih bang glông bruă kơđi čar amăng ngă tui bruă pơgang rơnuk rơnua plơi pla lŏn ia, pơhlôm hơđong klă mơnuih mơnam.

Khua Ding jum Tô Lâm pơhiăp amăng mông jơnum

Pơhiăp amăng mông jơnum, Khua Ding jum ơi Tô Lâm čih djă pioh hăng pơsit yôm hơdôm bôh than mơnuih apăn bruă, mơnuih ƀôn sang phường Quán Thánh dưi ngă amăng pơdŏng bruă abih bang mơnuih ƀôn sang pơgang rơnuk rơnua plơi pla lŏn ia hơdôm hrơi rơgao. Khua Ding jum lăi lĕ rơgao hơdôm bruă mă Hrơi jơnum abih bang mơnuih ƀôn sang pơgang rơnuk rơnua plơi pla lŏn ia brơi ƀuh tơlơi hơk mơ-ak, pran jua gum hrom hơbit hăng tơlơi djru gum, đăo gơnang mơng mơnuih ƀôn sang amăng tơlơi git gai mơng hơdôm gưl Ping gah hăng Gong gai hăng Khul kông ang phường; mơnuih ƀôn sang dưi ngă tui tơlơi dưi ngă pô, tơhnal pơčeh phrâo hăng gum hrom mă pô bruă abih bang mơnuih ƀôn sang pơgang rơnuk rơnua plơi pla lŏn ia pơjing pran kơtang prong, djru wai lăng hơđong kơjăp amăng djop bruă./.

Siu H’ Prăk: Pơblang