Pơhiăp ƀơi mông ngă bruă, Khua ding jum Tô Lâm pơpŭ bơni kơ hơdôm tơlơi mơ̆ Ping gah, gong gai hăng mơnuih ƀôn sang tơring čar Ninh Bình hơmâo ngă amăng hrơi blan rơgao. Khua ding jum Tô Lâm kiăng tơring čar kiăo tui tơlơi git gai črâo bruă mơ̆ng Ping gah, Kơnuk kơna, Ƀirô khua pơ ala mơnuih ƀôn sang, biă ñu lĕ pơphun ngă tŭ yua Tơlơi pơtrun mrô 30 mơ̆ng Ding jum kơđi čar kơ pơđĭ kyar bơwih ƀong huă - mơnuih mơnam, pơhlôm pơgang lŏn ia, rơnuk rơnua kual lŏn dăo ia krông Hồng truh pơ thun 2030, anăp nao pơ thun 2045.

Hăng bruă pơđĭ kyar bơwih ƀong huă - mơnuih mơnam, Khua ding jum Tô Lâm kiăng Ninh Bình gơñăm pơđĭ kyar măi mok, pơhưč tuh pơ alin, tuai čuă ngui. Pơtrut tui, hơmâo mơnuih mă bruă, tơlơi gêh gal, iâu pơthưr mơnuih ƀôn sang gum pơđĭ kyar bơwih ƀong huă - mơnuih mơnam mơ̆ng tơring čar.