Tlam tom brơi, lơ 4/6, ƀing pơ ala mơnuih ƀôn sang dêh čar ăt tơña hăng lăi glăi amăng bruă tuh tia pơkra ming hăng sĭ mơdrô. Ƀing pơ ala mơnuih ƀôn sang rơkâo Khua ding jum Tuh tia hăng sĭ mơdrô ơi Nguyễn Hồng Diên pơblang rơđah ƀiă hơdră mă bruă dŏ kơƀah, pơgăn bruă ngă soh glăi kiăng anăp nao akŏ pơjing bruă sĭ mơdrô hăng điện tử, hơdôm jơlan hơdră djru ba laih anun pơsir tơlơi tơnap tap brơi kơ sang bruă sĭ mơdrô rŭ glăi bruă pơkra ming gơnam sĭ mơdrô.

Khua ding jum ơi Nguyễn Hồng Diên brơi thâo: hơdôm thun rơgao, bruă mă sĭ mơdrô amăng plăng điện tử jing sĭ mơdrô amăng internet ƀơi Việt Nam ăt pơđĭ kyar kơtang pơkă rim thun đĭ mơ̆ng 20-25%, Việt Nam dưi dăp amăng khul mrô 5 boh dêh čar hnong pơđĭ kyar mrô sa amăng rŏng lŏn tơnah; rơnoh prong sĭ mơdrô amăng plăng điện tử rơbêh 20 klai dolar Mi. Khua ding jum lăi, đing nao lu hơdră pơđĭ boh tŭ yua wai lăng, pơgang ba tơlơi dưi kơ mơnuih blơi yua kah hăng ngă pơgiong tơlơi phiăn, kơtưn pel ĕp, akŏ pơjing khul tŭ mă hăng lăi glăi kơ mơnuih blơi yua, brơi lui mơtam tơlơi sĭ mơdrô ƀu găl kơđi amăng atur ia rơgơi mrô. Kơ bruă wai lăng sĭ mơdrô amăng plăng facebook, Ding jum tuh tia hăng sĭ mơdrô git gai ngă hrŏm djop sang bruă brơi pel ĕp, wai lăng hăng pơsir tong ten; jao tơhan wai lăng anih sĭ mơdrô krăo lăng sit ƀuh, pơgăn hăng pơsir tañ bruă ngă soh glăi.