VOV4.Jarai - Ƀrô hrơi Tê̆t Nhâm Dần 2022, mơguah lơ 26/1, Grup mă bruă mơng Ping gah tơring čar, Jơnum min pơ ala mơnuih ƀon sang, Jơnum min mơnuih ƀon sang, Jơnum min djŏp djuai ania mơnuih mơnam Việt Nam tơring čar Dak Lăk yua ơi Nguyễn Đình Trung - Khua git gai Ping gah ngă Khua ba jơlan nao čuă, hơ-ơč hmưi Tê̆t hăng brơi gơnam kơ hơdôm anom bruă tơhan tơring čar, Anom bruă kơsem min klin duam ruă kual Dap Kơdư hăng Sang ia jrao tơhan pơdong jăng jai mrô 1.

Ơi Nguyễn Đình Trung hăng Grup khua brơi gơnam kơ ƀing ơi ia jrao ƀơi Sang ia jrao pơdong jăng jai mrô 1.

Ƀơi hơdôm anih nao čuă, grup hơmâo hmư̆ khua mua mơng hơdôm anom bruă lăi pơthâo glăi bruă mă mơng anom bruă amăng thun 2021 ăt kah hăng hơdôm bruă kiăng ngă amăng thun 2022, biă ñu lĕ pơhlôm rơnuk rơnua hơđong kơjăp, bruă pơjrao brơi mơnuih ƀă klin Covid-19 hăng lăng ba tơlơi suaih pral kơ mơnuih ƀon sang čơkă Tê̆t 2022. Khua git gai Ping gah tơring čar Nguyễn Đình Trung hơ-ơč hmưi kơ khua mua, ling tơhan, ơi ia jrao, mơnuih mă bruă pơ sang ia jrao thun phrâo 2022 yâo mơ-ak, hiam drơi jăn pran jua, čang rơmang amăng thun blan pơ anăp, khua mua, ling tơhan, ơi ia jrao pơtrut tui tơlơi dưi ngă, ngă truh kih djŏp bruă hơmâo jao.

Siu H’Mai: Pơblang