Ƀơi anai Khua git gai Ping gah hăng grŭp hyu mă bruă hmâo nao tuĭ ñang hơdor glăi ƀing Ling tơhan sông kơtang pơsăn drơi ƀơi Gŏng kut hơdor glăi ƀing tơhan sông kơtang pơsăn drơi kơ lŏn ia, čuă ƀơk gơnam tam kơ mơnuih apăn bruă tơhan Trạm Rada 27 hăng git gai mông mă bruă hăng Ping gah tơring glông Bạch Long Vĩ.

Pơtŏng sit tơring glông hmâo bruă mă lĕ anom phun bruă djru gah tlôn, sa anih anom phun puih kơđông wai lăng pơgang rơnuk rơnua hơđong ƀơi ia rơsĭ, biă ñu lĕ kual ia rơsĭ Bạch Long Vĩ lĕ sa amăng 8 anih anom mă akan hơdang prong mơ̆ng kual Tŏng Wing Kơdư dêh čar, hmâo lu mơta akan hơdang ia rơsĭ, Khua git gai Ping gah dêh čar lăi rơđah, mơ̆ng tơhnal gal, pran gơgrong hăng anô̆ gal mơ̆ng Bạch Long Vĩ, ƀôn prong hăng tơring glông khom pơmin kơ kơčăo bruă hăng hơdră ngă rơđah pioh tơring glông jing anih phun djru gah tlôn bruă mă akan hơdang, pơđĭ kyar bruă rông akan hơdang hăng ngă pơhưč tuai čuă ngui, kah hăng pran jua pơtrun pơsit mơ̆ng Ding jum kơđi čar. Gah bruă jao pơ̆ anăp anai, Khua git gai Ping gah dêh čar rơkâo, khom pơkă klă kual bơwih ƀong hăng kual ia rơsĭ pioh hmâo jơlan gah tuh pơplai ha amăng plĕ gah anom mă yua kah hăng anih pơkĕ apui lơtrik, jơlan nao rai, dăng kông, ring bruă mă yua kơ bruă akan hơdang, bŏng glăi pơplih ayuh hyiăng, ia rơsĭ đĭ prong, anih kơđăp bĕ kơthel, pơhlôm tơlơi pơkĕ hrŏm kơjăp pơđĭ kyar bơwih ƀong – mơnuih mơnam, nao hrŏm hăng hơkrŭ bruă pơgang pơgăn lŏn ia, rơnuk rơnua plơi pla./.