Mơguah tom brơi (15/8) ƀơi Ƀirô mă bruă Ping gah dêh čar ta, hơdor glăi 79 thun Hrơi Ngă hơkrŭ blan 8 hăng Hrơi pơdŏng lŏn ia djop mơnuih dưm kơnar Việt Nam lơ 2/9, Ding jum kơđi čar pơphun Jơnum bưp ƀô̆ mơta ƀing khua mua git gai, khua hơđăp git gai Ping gah Kơnuk kơna kiăng lăi pơhing kơ tơlơi mơ̆ng Ping gah, mơ̆ng lŏn ia amăng hơdôm blan akô̆ thun 2024, bruă phun hơdôm blan rơnuč thun 2024 hăng hơdôm thun pơ̆ anăp anai.

Pơhiăp amăng mông jơnum, pơ ala kơ ƀing khua mua git gai Ping gah, Kơnuk kơna, Khua git gai Ping gah dêh čar, Khua mir sir dêh čar ta ơi Tô Lâm tơpă ară bơni ƀing khua mua git gai, khua mua hơđăp git gai Ping gah, Kơnuk kơna, Jơnum min djop djuai ania mơnuih mơnam dêh čar Việt Nam nao pơhmư̆ mông bưp ƀô̆ mơta bă kơ bôh tŭ yua anai; pơpŭ mơ-ĭt kơ ƀing khua hơđăp git gai  hrŏm hăng sang anô̆ tơlơi suaih pral, yâo mơ-ak hăng djop mơta bruă klă hiam. Khua git gai Ping gah dêh čar, Khua mir sir dêh čar ta ơi Tô Lâm lăi rơđah, Ding jum kơđi čar, Grŭp ding kơna git gai Ping gah khut khăt črâo ba đing nao git gai, pơhlôm, pơplih phrâo, pơtrut rơnoh, tañ ngă giong hơdôm tơhnal ba tơbiă, bruă pơkă, bruă jao mơ̆ Tơlơi pơtrun pơsit Jơnum tal 13 mơ̆ng Ping gah dêh čar ta ba tơbiă; đing nao pơtlaih tơlơi tơnap, tơlơi gun gah hơdră pơkă, ngă gal brơi prong hloh kơ djop bruă mă kah hăng tơđar amăng rơwang tơlơi phiăn pơkă, djru pơdŏng lŏn ia, pơđĭ tui tơlơi hơdip mơnuih ƀôn sang mơ̆ng khul grŭp, mơnuih bơwih ƀong amăng lŏn ia hăng pơ̆ dêh čar tač rơngiao./.