Čơtlăm lơ 9/8, Khua git gai Ping gah dêh čar, Khua mir sir dêh čar ta ơi Tô Lâm ba jơlan hlâo grŭp mă bruă dêh čar ta nao čuă hăng git gai mông  mă bruă hăng Grŭp apăn bruă Ping gah ƀôn prong Hà Nội kơ tơlơi ngă tui Tơlơi pơtrun pơsit Jơnum tal 13 mơ̆ng Ping gah hăng Jơnum Ping gah ƀôn prong Hà Nội tal 17 rơwang bruă 2020-2025, bruă lăi pơthâo abih, pok pơhai ngă tui Tơlơi črâo ba mrô 35 lơ 14/6/2024 mơ̆ng Ding jum kơđi čar kơ Jơnum Ping gah hơdôm gưl anăp nao Jơnum khua pơ ala đơ đam dêh čar tal 14 mơ̆ng Ping gah.

Lăi nao bruă jao pơ̆ anăp, Khua git gai Ping gah dêh čar, Khua mir sir dêh čar ta ơi Tô Lâm rơkâo, Ƀôn prong khom đing nao khut khăt pok pơhai lu bruă pơsir kơtang tañ giong hăng bôh tơhnal prong hloh tơdah dưi, amăng anun ngă giong tañ bruă pơkă, kơčăo bruă ba tơbiă amăng Tơlơi pơtrun pơsit Jơnum Ping gah ƀôn prong tal 17 rơwang bruă 2020-2025. Khua git gai Ping gah dêh čar, Khua mir sir dêh čar ta ơi Tô Lâm rơkâo ƀôn prong Hà Nội đing nao mă yua ba glăi bôh tơhnal djop ngăn rơnoh pioh pơđĭ kyar; mă bruă bơwih ƀong ƀôn prong ngă pran pơtrut, pơkĕ hrŏm hăng pơđĭ kyar bôh thâo, pơjing mơnuih Hà Nội klă hiam, tâ̆o yâo, nao hrŏm hăng anih anom pơđĭ kyar kơplah wah ƀôn prong hăng plơi pla tui jơlan gah rơnuk anai, thâo rơgơi, hrưn đĭ lĕ ƀôn prong tô nao rai đơ đam rŏng lŏn tơnah./.