VOV4.Jarai - Tlam lơ 10/3, ƀơi Ƀirô mă bruă, tui tơlơi git gai mơng Khua git gai Ping gah dêh čar ơi Nguyễn Phú Trọng, ƀing khua mua pơprong hrŏm hăng khua mua amăng Khul apăn bruă Ping gah dêh čar hơmâo mông jơnum, lăng glăi hơdôm bruă phun amăng lŏn ia, kơđi amăng jar kmar amăng 2 blan akŏ thun 2022 hăng bruă jao phun pơ anăp dong. Ƀing khua mua pơprong pơsit tong, pơ anăp anai dêh čar ta amra tŏ tui dong ƀơi anăp kơ lu tơlơi ngă tơnap tap, tơlơi lông mơng blơi gơnam tam, nua ia săng, ia jâu amra đĭ kơtang; klin Covid-19 dŏ ngă tơnap tap. Đĭ pơhiăp pơđut mông jơnum, Khua git gai Ping gah dêh čar ơi Nguyễn Phú Trọng rơkâo, djop gưl, gơnong bruă tŏ tui gum hrŏm brơi lăp djơ̆, ha amăng plĕ, git gai ngă tui hơdôm bruă jao tŭ yua hloh. Tui anun, đing nao pok pơhai ha amăng plĕ hơdôm hơdră pơgang klin Covid-19; ngă tui djop bruă jao, hơdră bruă mơng Jơlan hơdră hơkrŭ glăi hăng pơđĭ kyar bơwih ƀong huă - mơnuih mơnam; kiăo tui lăng kơđi amăng jar kmar, pơhlôm rơnuk rơnua, biă mă ñu mơnuih ƀon sang, gơnam tam, tơlơi dưi djơ̆ tơlơi phiăn mơng mơnuih ƀon sang, tŏ tui git gai khut khăt amăng bruă pơgăn hưp ƀong kông ngăn, bruă ngă soh …

Siu Đoan: Pơblang