VOV4.Jarai - Mơguah lơ 15/4, tui tơlơi git gai mơng Khut git gai Ping gah dêh čar ơi Nguyễn Phú Trọng, Ding jum kơđi čar, Khul apăn bruă Ping gah pơphun jơnum đơ đam dêh čar kiăng hruă kjăp hăng pok pơhai ngă tui tơlơi pơtrun mrô 11 mơng Ding jum kơđi čar amăng hơdră pơđĭ kyar bơwih ƀong huă mơnuih mơnam, pơhlôm rơnuk rơnua kual tong krah hăng kual ataih gah kơdư truh thun 2030, anăp nao truh thun 2045.

Mông jơnum

Lăng glăi hơdom bruă kiăng ngă hăng ngă hiưm pă kiăng kơ ngă tŭ yua tơlơi pơtrun mơng Ding jum kơđi čar tal anai, Khua git gai Ping gah ơi Nguyễn Phú Trọng lăi pơtong 5 mơta bruă hăng 14 boh tơring čar amăng kual hăng hơdôm Ding jum, gơnong bruă, amăng anun kiăng kơ hruă kjăp djop mơta, lăp djơ̆ hăng dơlăm yôm phăn, hơnong pơkă, tơlơi rơkâo, boh tơhnal mơng tơlơi pơtrun, thâo hluh rơđah tơlơi črâo trun, hơdră git gai, hơdôm bruă kiăng ngă. Ba glăi tơlơi tŭ ư hrŏm amăng djop gưl, djop gơnong bruă, abih bang mơnuih ƀon sang hăng anom bơwih ƀong sĭ mơdrô kơ tơlơi gơgrong hăng tơlơi yôm amăng kual. Hăng pran jua kiăng thâo hluh rơđah laih dong pơsir bruă lăp djơ̆, klă hloh tơlơi rô nao rai kơplah wah kiăng pơđĭ kyar amăng kual hăng pơđĭ kyar hrŏm dêh čar. Anai ăt lĕ bruă yôm phăn biă mă hăng kiăng hloh, pơdah tơlơi gơgrong mơng Ping gah hăng đơ đam dêh čar hăng mơnuih djuai ania ƀiă kual ataih, asuek gah kơdư.

Siu Đoan: Pơblang