VOV4.Jarai - Mơguah lơ 13/7, ƀơi Hà Nội, Ping gah ling tơhan dêh čar pơphun Jơnum lăng glăi boh than git gai ngă tui bruă jao amăng bruă Ling tơhan, pơgang rơnuk rơnua amăng 6 blan akŏ thun hăng pok pơhai bruă mă amăng 6 blan rơnuč thun 2022. Khua git gai Ping gah dêh čar, Khua git gai ping gah Ling tơhan git gai mông jơnum. Đĭ pơhiăp amăng mông jơnum, Khua git gai Ping gah dêh čar ơi Nguyễn Phú Trọng pơpŭ bơni ƀing apăn bruă, ling tơhan hơmâo gum pơgôp, mut hrŏm amăng bruă jao gah ling tơhan amăng 6 blan akŏ thun 2922.

Kiăng kơ ngă klă bruă jao amăng 6 blan rơnuč thun Khua git gai Ping gah rơkâo: Ping gah Ling tơhan, Ding jum ling tơhan kiăng đing nao bruă git gai ngă klă hloh hơdôm bruă mă tui tơlơi pơtrun mơng Jơnum Ping gah tal XIII, Tơlơi pơtrun mơng Jơnum Ping gah Ling tơhan tal XI. Đing nao git gai klă dong amăng bruă kơsem min, krăo lăng hlâo djop mơta bruă, hơdeč hmar, hmao tlôn pơphô bruă brơi Ping gah, Kơnuk kơna kiăng pơsir hĭ klă hloh djop bruă, anăm pơtah tai amăng bruă wai pơgang rơnuk rơnua, rơngai lŏn ia.

Siu Đoan: Pơblang