Amăng hơdôm tơlơi gum pơgôp mơng Khua git gai Ping gah dêh čar ơi Nguyễn Phú Trọng mơ̆ yôm hloh lĕ bruă pơgăn hưp ƀong kông ngăn, bruă ngă soh amăng bruă pơjing, sit biă ñu hơdôm tơlơi pơkă mơng Ping gah hơmâo pơgôp prong prin, pơsir hĭ hơdôm tơlơi lông, tơlơi tơnap tap hloh mơng lŏn ia amăng rơwang pơđĭ kyar phrâo.

“Bruă čuh bơbung drong” jing boh pơhiăp juăt lăi nao mơng mơnuih mơnam lơm lăi nao nao kơ bruă pơgăn hưp ƀong kông ngăn, bruă ngă soh yua Ping gah ta pok pơhai hăng Khua git gai Ping gah dêh čar lĕ pô git gai phun dong mơng Jơnum tal 11 truh ră anai.

Kơ-iăng nai tha prin, nai prin tha Lê Văn Cường, Kơ-iăng khua anom bruă pơjing Ping gah, sang hră pơtô bruă kơđi čar dêh čar Hồ Chí Minh ăt ƀu wơr ia mơta mơng Khua git gai Ping gah dêh čar ơi Nguyễn Phú Trọng amăng mông pơđut hĭ Jơnum gơnong glông lok 6 tal 11, lơ 15 blan 10 thun 2012. Anai lĕ ia mơta mơng pran jua hning rơngŏt mơng khua apăn akŏ prong hloh ƀơi anăp Ping gah, ƀơi anăp mơnuih ƀôn sang lơm “hơmâo sa, dua čô mơnuih apăn bruă Ping gah” ngă soh. Ia mơta anun jing pran kơtang, jing tơlơi gir run mơng Ping gah, abih bang mơnuih ƀôn sang amăng bruă pơgăn hưp ƀong kông ngăn, bruă ngă soh:

“Lơm pơphun bruă pơgăn hưp ƀong kông ngăn, bruă ngă soh, Khua git gai Ping gh dêh čar ơi Nguyễn Phú Trọng ăt brĭ ƀlĕ ia mơta mơn. Yua hơget ? Yua Khua git gai Ping gah dêh čar hơmâo lăi laih, bruă pơgăn hưp ƀong kông ngăn, bruă ngă soh lĕ bruă bơdjơ̆ nao ƀing ta, ngă ruă pran jua, ñu ăt ƀu gưt kơdong glăi ƀong ngă gŏp, ƀu gưt pơsir kơđi hlơi. Laih dong ƀing gŏp bơdjơ̆ nao kơ bruă anai, ƀing ta ăt khut khăt pơsir hĭ, ƀu kŏm hlơi ôh, ƀu hơmâo hlơi dong gah rơngiao, mah hlơi tŭ mơn. Ƀơi anai, pran ol kơdol mơng Khua git gai Ping gah dêh čar ngă glưh pran jua, ngă lar hyu, ngă ƀing ta ƀu tơdu pran, ƀu čun tơkai, samơ̆ anăm ngă amưng, pơtah hơtai. Ngă tui anun kah djơ̆ hăng bruă jao mơ̆ Ping gah hăng mơnuih ƀôn sang jao”.

Ñu lĕ pô ngă “Khua git gai phun”-Khua khul git gai, Khua git gai Ping gah dêh čar ơi Nguyễn Phú Trọng hrŏm hăng mơnuih ƀôn sang yak nao rơnuk pơgăn hưp ƀong kông ngă hăng pran jua ƀu lui hlơi ôh, ƀu hơmâo anih kŏm, ƀu hơmâo mơnuih gah rơngiao. Kơnong mơng akŏ rơwang bruă mă mơng Jơnum tal 13 truh ră anai, Khul apăn bruă Ping gah, Ding jum kơđi čar, Khul git gai Ping gah hơmâo pơsir hĭ bruă ngă soh hăng 44 khul grup hăng 164 čô mơnuih apăn bruă Ping gah, amăng anun hơmâo 13 čô Ding kơna Khul apăn bruă Ping gah, 17 čô Ding kơna khul apăn bruă Ping gah hơđăp hăng 19 khua tơhan gưl khua git gai amăng khul ling tơhan; 19 Ding kơna khul apăn bruă Ping gah hăng Ding kơna Ding jum kơđi čar brơi pơdơi bruă. Tui sit nik anai, tui tơlơi lăi pơthâo mơng Khua git gai Ping gah ơi Nguyễn Phú Trọng-mah “ruă pran biă mă” samơ̆ hơmâo pơgôp hơkrŭ kjăp pran đăo gơnang mơng mơnuih ƀôn sang hăng tơlơi git gai mơng Ping gah:

“Bruă pơgăn hưp ƀong kông ngăn yua Ping gah ta git gai mơ̆ khua apăn akŏ lĕ ơi Nguyễn Phú Trọng hơmâo pok pơhai tong ten, lăp djơ̆. Ƀing ta pơdah pran gir run, khut khăt, hơmâo pơphun lu wŏt pel ĕp tong ten bruă hưp ƀong kông ngăn amăng abih bang mơnuih. Kâo đăo gơnang, hăng tơlơi yak nao pơgăn hưp ƀong kông ngăn, bruă ngă soh ƀơi Việt Nam tui tơlơi git gai mơng Ping gah amra tŏ tui ba glăi tơlơi dưi”.

Ƀu kơnong hăng bruă mă sit nik, bruă pơgăn hưp ƀong kông ngăn, bruă ngă soh đôč ôh mơ̆ ăt hơmâo khua git gai Ping gah dêh čar ơi Nguyễn Phú Trọng pơsit tong jing boh tơhnal amăng tơlơi čih “Khut khăt, gir run pơgăn hưp ƀong kông ngăn, bruă ngă soh, pơgôp pơjing Ping gah hăng Kơnuk kơna jai hrơi ngă bruă tơpă sit, hơđong kjăp”. Kơ-iăng nai tha prin ơi Vũ Tình, Kơ-iăng khua sang hră gưl prong Khoa học xã hội và Nhân văn hơđăp, sang hră dêh čar ƀôn prong Hồ Chí Minh pơsit tong, hơdrôm hră lĕ tơlơi črâo ba brơi hơdôm bruă pơgăn hưp ƀong kông ngăn, bruă ngă soh:

“Rơnuk tơdơi anai kiăng hluh rơđah, ƀing gơñu kiăng kiăo tui hrăm, pran gơgrong kiăng pơhlôm kơtang hloh ƀơi anăp hơdôm tơlơi ngă soh, hơdôm phă pơrai bruă pơgăn hưp ƀong kông ngăn, bruă ngă soh. Hluai tui hơdrôm hră anai, rơnuk tơdơi amra hluh rơđah dong tơlơi gơgrong mơng ƀing gơñu hăng lŏn ia, hăng djuai ania, kiăng pơhrăm gơñu pô, hrăm tui hiưm pă kiăng djơ̆ hăng tơlơi pơsit lĕ ƀing mơnuih glăk hăng amra ngă pô amăng lŏn ia kơñ pơgi”.

Tui tơlơi git gai mơng Khua git gai Ping gah dêh čar ơi Nguyễn Phú Trọng, bruă pơgang, pơgăn hưp ƀong kông ngăn, bruă ngă soh hơmâo pơphun ha amăng plĕ hăng bruă ruah mơnuih apăn bruă. Hăng hơnong pơkă djă bong tơlơi hơđong kjăp rah, pơdah tong ten pran khăp pap; mơng rơwang mă bruă Jơnum tal 11 truh ră anai, Ping gah hơmâo pơtrun lu tơlơi pơkă tong ten. Amăng anun, bruă “brơi pơdơi”, “lui mă bruă” hơmâo čih amăng tơlơi pơkă mrô 41 lơ 3/11/2021 mơng Ding jum kơđi čar tal 13 lĕ sa amăng hơdôm tơlơi kơđŏm glăi yôm, pơplih phrâo amăng bruă pơlir kjăp kơplah wah hrăm, ngă tui tơlơi pơmĭn, bruă mă, gru hơdip mơng Hồ Chí Minh hăng bruă pơjing, pơplih pơkra mơng Ping gah:

Nai tha prin, nai prin tha Tạ Ngọc Tấn, Ding kơn Ping gah hơđăp, Kơ-iăng khua khul Lý luận gơnong glông pơsit tong, hlâo anun aka ƀu ƀuh Ping gah ta hơmâo hră pơtrun pơsit djơ̆ hrŏm hăng djop mơta bơdjơ̆ nao bruă ruah mơnuih apăn bruă tui ră anai. Boh than anai lĕ mơng pran tuh rơyuh pran jua, tơlơi gơgrong mơng Khua git gai Ping gah dêh čar ơi Nguyễn Phú Trọng amăng giăm 3 rơwang mă bruă:

“Amăng hơdôm tal sem lăng klah čun mơng hơdôm tal jơnum pơƀut, hră lăi pơthâo bruă kơđi čar lêng pơsit tong anŏ aka ƀu klă hloh ăt lĕ pơphun ngă tui. Mơ kiăng pơphun ngă tui klă kiăng hơmâo hơdră pơhlôm tong ten. Khul apăn bruă Ping gah tui tơlơi git gai mơng Khua git gai Ping gah ơi Nguyễn Phú Trọng hơmâo pơgiong hơdôm tơlơi pơkă, tơlơi pơsit tong amăng bruă mă mơng Ping gah, mơng tơlơi pơkă pơphun, jơlan gah bruă mă mơng djop gưl Ping gah, truh pơ hơdôm khul grup, tơlơi rô nao rai kơplah wah hơdôm anom bruă…kiăng pơgiong hơdră bruă amăng bruă mă mơng Ping gah. Hăng lơm ƀing ta hơmâo hơdră bruă tong ten, lăp djơ̆, rơgơi hloh hăng dưi ngă tui mơng ră anai, tơlơi anai amra yôm phăn biă mă amăng bruă kơtưn tơlơi gơgrong git gai mơng Ping gah, kơtưn tŭ yua amăng git gai hăng apăn akŏ mơng Ping gah”.

Hăng hơdôm tơlơi pơgôp yôm phăn amăng bruă ngă hơkrŭ mơng Ping gah, ăt ƀu hlao đơi hlơi tơdah lăi, Khua git gai Ping gah dêh čar ơi Nguyễn Phú Trọng lĕ sa čô mơnuih tơkeng rai kiăng pơsir tơnap tap, tơlơi lông amăng rơwang gru grua lŏn ia.

Rơkâo pơjưh tơlơi čih hăng hơdôm tơlơi bơră ruai ngă ol kơdol pran jua mơng Khua git gai Ping gah dêh čar lơm dŏ hơdip. Rĭm wŏt kiăng lăi kiăng pơdah pran jua, ñu juăt lok glăi hơdôm boh pơhiăp yôm mơng Pa-ven Kốp-cha-gin amăng tơlơi čih hmư̆ hing “Thép đã tôi thế đấy” mơng pô čih boh pia Liên Xô Ni-cô-lai Ốt-xtơrốp-xki. Anai lĕ tơlơi pơmĭn mơ̆ Khua git gai Ping gah dêh čar ơi Nguyễn Phú Trọng hơdip kiăo tui:

“Anŏ yôm hloh mơng ană mơnuih lĕ tơlơi hơdip hăng tơlơi đăo gơnang, yua tơlơi hơdip sa čô mơnuih ha wŏt đôč. Kiăng hơdip hiưm pă anăm hơ-ưi yua thun blan hơdip pơtah hơtai; kiăng huăi mlâo yua hơdôm bruă ngă soh, ngă sat, ngă arăng djik djak; kiăng truh mông tơ̆i pran, ta ăt pơ-ư ang lĕ: Tơlơi hơdip kơ ta pô, pran jua ta anai, hơmâo tuh tơyuh abih pran jua brơi tơlơi hiam klă hloh amăng tơlơi hơdip mơda-bruă djru hơkrŭ pơklaih rơngai lŏn ia, rơnuk rơnua ană mơnuih, ba glăi tơlơi hơdip yâo mơ-ak brơi mơnuih ƀôn sang./.