Khua git gai Ping gah dêh čar ơi Nguyễn Phú Trọng pơsit tong Việt Nam lêng kơ lăng yôm tơlơi dong yua, tơlơi gum djru prong prin mơng Liên Xô, amăng anun hơmâo dêh čar Nga hlâo adih hăng ră anai amăng bruă blah wang pơklaih rơngai lŏn ia amăng 2 tal kơdong glăi ayăt kiăng ba glăi tơlơi rơnuk rơnua hăng pơjing, wai pơgang lŏn ia ră anai. Khua git gai Ping gah dêh čar pơsit tong dêh čar Việt Nam lêng kơ lăng yôm gru grua, bruă ngă hrŏm yôm phăn djop mơta bruă hăng Nga, anai lĕ tơlơi đing nao phun amăng hơdră pơtom hiăp mơng dêh čar.

Khua mir sir ơi Vladimir Putin pơdah tơlơi hok mơ-ak lơm rai čuă Việt Nam hăng bưp glăi Khua git gai Ping gah dêh čar ơi Nguyễn Phú Trọng, lăi pơtong Việt Nam lĕ gơyut gơyâo, dêh čar ngă gŏp đăo gơnang hăng dêh čar Nga; tơlơi rô nao rai dua bơnah hơmâo găn rơgao lu tơlơi lông; bruă pơđĭ kyar tơlơi rô nao rai ngă hrŏm djop mơta hăng Việt Nam lĕ tơlơi đing nao phun amăng hơdră pơtom hiăp mơng Nga amăng kual Asia-Thái Bình Dương; čang rơmang tal rai čuă anai amra pơtrut hiam klă tơlơi rô nao rai dua bơnah.