VOV4.Jarai - Amăng tal nao mă bruă ƀơi Quảng Ninh, mơguah lơ 6/4, Khua git gai Ping gah dêh čar ơi Nguyễn Phú Trọng ba jơlan hlâo grup hyu mă bruă gơnong glông hơmâo nao čuă, pel ĕp, pơ alum pran jua abih bang mơnuih apăn bruă, kông nhơn ƀơi Kông ti pơčuh ngăn Than Vàng Danh - Vinacomin amăng plơi prong Uông Bí.

Tơdơi kơ mông nao pel ĕp tơl anih tơlơi hơdip kơ mơnuih apăn bruă, kông nhơn ƀơi anih dŏ hơdip hrŏm brơi ƀing kông nhơn mơng kông ti, hiăp bih hăng abih bang kông nhơn, ƀing ngă bruă gah boh thâo măi mok, Khua git gai Ping gah dêh čar ơi Nguyễn Phú Trọng pơsit tong tơlơi yôm phăn hăng gru grua mơng kông nhơn Việt Nam lăi hrŏm hăng ƀơi tơring čar Quảng Ninh lăi phara mơng đưm truh ră anai lĕ yôm phăn biă mă amăng djop rơnuk amăng blah wang, amăng rơnuk rơngai hăng amăng rơnuk pơjing hăng wai pơgang lŏn ia ră anai. Tui hăng Khua git gai Ping gah dêh čar ơi Nguyễn Phú Trọng ƀing kông nhơn Việt Nam lêng hơmâo hơdôm bruă yôm phara ƀu djơ̆ kơnong lĕ ƀing mă bruă rơgơi đôč ôh mơ̆ hăng hơmâo tơlơi hơdip hiam klă hăng lêng thâo khăp pap djru tơdruă.

Siu Đoan: Pơblang