Đĭ pơhiăp git gai mông jơnum, Khua git gai Ping gah dêh čar ơi Nguyễn Phú Trọng rơkâo Ping gah Kông ang, Ding jum kông ang tŏ tui pran gơgrong phun amăng pok pơhai tơlơi pơtrun mrô 12 mơng Ding jum kơđi čar kiăng pơtrut pơjing tơhan kông ang mă bruă tơpă sit, hơđong kjăp, chính quy, pơplih phrâo, djơ̆ hăng tơlơi kiăng, bruă jao amăng rơnuk phrâo; gum hrŏm kjăp hăng Ping gah Khua pơ ala mơnuih ƀon sang dêh čar, Khul apăn bruă Ping gah Kơnuk kơna, djop Ping gah tơring čar, ƀôn prong ba tơlơi pơtrun mrô 12 hăng hơdôm tơlơi pơtrun mơng Jơnum gơnong glông kơ bruă pơđĭ kyar bơwih ƀong huă-mơnuih mơnam hăng pơhlôm rơnuk rơnua thun 2030, anăp nao thun 2045 ƀơi 6 kual bơwih ƀong đơ đam dêh čar amra ngă tui sit nik.

Khua git gai Ping gah ơi Nguyễn Phú Trọng rơkâo, Ping gah kông ang dêh čar gir run pơjing tơhan kông ang mă bruă tơpă sit, hơđong kjăp, chính quy, hơdeč hmar, pơplih phrâo, hluai tui pran “Dŏ Ping gah dŏ ƀing gơñu”, “Kơdrưh ang lĕ tơlơi yôm hloh, prong hloh”.