VOV4.Jarai - Mơguah lơ 18/7, Khua git gai Ping gah dêh čar ơi Nguyễn Phú Trọng nao pơhmư̆ hăng đĭ pơhiăp amăng tal hơdor glăi 60 thun hrơi akŏ pơjing bruă pơtom hiăp (5/9), 45 thun hrơi kĭ tơlơi pơkôl giang mah hăng ngă hrŏm Việt Nam - Lao (18/7), Thun gum pơgôp giang mah Việt Nam - Lao, Lao - Việt Nam thun 2022 hơmâo pơphun yôm phăn ƀơi plơi prong jưh jom Hà Nội.

Nao jơnum hrŏm hơmâo ƀing khua mua glăk mă bruă, khua mua hơđăp mơng Ping gah, Kơnuk kơna hăng ơi Buonthong Chitmany, Ding kơna Ding jum kơđi čar, Khua apăn bruă Ping gah mơnuih ƀon sang ngă hơkrŭ dêh čar Lao, Kơ-iăng Khua mir sir dêh čar Lao ba jơlan hlâo Grup khua mua pơprong mơng Ping gah, Kơnuk kơna Lao nao ngă lơphet. Amăng mông jơnum, Khua git gai Ping gah dêh čar ta ơi Nguyễn Phú Trọng pơsit tong dua boh dêh čar ha guai jê̆ giăm, mơñum hrŏm sa ară ia krông Mê Công, gơnang nao hrŏm čư̆ Trường Sơn hing ang, Việt Nam hăng Lao hơmâo gru grua ngă hrŏm bơkơnar, pơlir hơbit jê̆ giăm amăng sui thun ayun blan mơng hrơi akŏ pơjing hăng wai pơgang mơng dua bơnah.

Dua Ping gah, dua kơnuk kơna hăng mơnuih ƀon sang kiăng thâo gum pơgôp, pơlir hơbit, kơtưn ngă hrŏm kiăng gum hrŏm găn rơgao djop tơlơi tơnap tap, tŏ ngă tui hơdôm hơnong pơkă rơngai lŏn ia hăng tui chủ nghĩa xã hội; gum hrŏm ngă abih pran kiăng wai pơgang hăng ƀu pơdơi hơkrŭ tơlơi rô nao rai giang mah hing ang, gum pơgôp yôm phăn hăng ngă hrŏm djop mơta kơplah wah Việt Nam - Lao.

Siu Đoan: Pơblang