VOV4.Jarai - Tlam lơ 15/4, ƀơi Ƀirô Ping gah, Khua git gai Ping gah dêh čar ơi Nguyễn Phú Trọng hơmâo mông pơhiăp telephôn hăng Khua dêh čar India, Khua git gai Ping gah Mơnuih ƀon sang India Narendra Modi. Amăng mông pơhiăp telephôn, Khua dêh čar Narendra Modi pơsit tong Việt Nam lĕ sa amăng hơdôm dêh čar rô nao rai pơtom hiăp yôm phăn hăng India, sit biă ñu lĕ hơdră “Bruă mă anăp nao gah ngŏ”, pơdah lăng yôm hăng Kơnuk kơna laih dong mơnuih ƀon sang Việt Nam.

Khua git gai Ping gah dêh čar ơi Nguyễn Phú Trọng pơsit tong tơlơi rô nao rai giang mah kơplah wah Việt Nam - India hơmâo djop rơnuk khua mua hăng mơnuih ƀon sang dua bơnah hơkrŭ djă pioh kjăp hăng pơđĭ kyar; pơlir hơbit dơlăm tui gru grua hing ang, hơdôm tơlơi dưi hrŏm amăng lu bruă jar kmar yôm phun, anai lĕ atur kơ tơlơi rô nao rai ngă hrŏm hăng dong yua tơdruă tŭ yua ƀiă dong. Kơ bruă ƀơi kual ia rơsĭ Ngŏ, dua bơnah tŭ ư kơ tơlơi kiăng amăng bruă pơhlôm rơnuk rơnua, hơđong, ngă hrŏm, pơđĭ kyar hăng luă gŭ tơdruă tui tơlơi phiăn jar kmar, amăng anun hơmâo Công ước thun 1982 mơng Sang gum hơbit djop dêh čar kơ tơlơi phiăn kual ia rơsĭ, ƀu tek rơwek nao dêh čar pơkŏn yua kơ tơlơi rơngai amăng glông rơngĭt adai hăng kual ia rơsĭ.

Siu Đoan: Pơblang