VOV4.Jarai - Tlam lơ 20/5, ƀơi Ƀirô Ping gah, Khua git gai Ping gah ơi Nguyễn Phú Trọng tŭ jum Khua git gai pơ ala mơnuih ƀon sang dêh čar Singapore, ơi Tan Chuan-jin hăng ƀing khua mua mơng Singapore glăk rai čuă sit nik Việt Nam. Ơi Tan Chuan-jin pơdah pran jua hok mơ-ak lơ̆m tal blung a rai čuă sit nik, dưi ƀuh hơmâo tơlơi dưi prong amăng pơđĭ kyar bơwih ƀong huă- mơnuih mơnam mơng Việt Nam. Khua git gai pơ ala mơnuih ƀon sang dêh čar Singapore lăi pơthâo brơi Khua git gai Ping gah hơdôm boh tơhnal mơng jơnum hăng Khua git gai pơ ala mơnuih ƀon sang dêh čar ơi Vương Đình Huệ, amăng anun hơmâo bruă dua bơnah kĭ tơlơi pioh hơdor ngă hrŏm, tŭ ư kơtưn pơlăi nao rai, pơbưp khua mua, ngă hrŏm kơplah wah jơnum min, pơlăi nao rai tơlơi găn rơgao amăng djop mơta bruă mơng Ƀirô Khua pơ ala mơnuih ƀon sang dêh čar dua bơnah hăng dong yua tơdruă amăng jơlan jar kmar. Khua git gai Ping gah dêh čar ơi Nguyễn Phú Trọng hok mơ-ak kơ tal rai čuă Việt Nam mơng Khua pơ ala mơnuih ƀon sang dêh čar Singapore, pơdah pran đăo gơnang tal rai čuă anai lĕ hrơi mông yôm phăn kiăng dua bơnah anăp nao tal hơdor glăi 50 thun akŏ pơjing tơlơi rô nao rai pơtom hiăp hăng 10 thun akŏ pơjing bruă ngă hrŏm kơplah wah dua boh dêh čar truh thun 2023.

Siu Đoan: Pơblang