Tui tơlơi lăi pơthâo glăi, thun anai, gưl Ping gah hơdôm gưl hmâo pel ĕp laih rơbêh kơ 55 rơbâo grŭp Ping gah hăng rơbêh kơ 300 rơbâo čô mơnuih ping gah. Rơgao kơ pel ĕp, klah čun hmâo rơbêh kơ 1.700 khul ping gah hăng rơbêh kơ 6 rơbâo čô mơnuih ping gah hmâo bruă ngă ƀu klă, ngă soh phiăn. Pơhiăp črâo ba amăng mông jơnum, Khua git gai Ping gah dêh čar ơi Tô Lâm rơkâo pơ̆ anăp anai khom ngă tui dong ha amăng plĕ hơdôm bruă pơgang pơgăn tơlơi ngă soh phiăn, ngă bruă ƀu klă; tơlơi pơkă lĕ hmâo tơlơi ngă soh khom hmâo tơlơi klah čun, ƀu hmâo kual kom, ƀu hmâo tơlơi pơkă phara; kơtưn pơdŏng Ping gah klă hian, kơjăp kơtang, djơ̆ tui tơlơi kiăng bruă jao amăng rơnuk phrâo.

Khua git gai Ping gah rơkâo hơdôm gưl ping gah, grŭp ping gah, Jơnum min pel ĕp kơđi tơlơi hơdôm gưl tañ dưm dăp, rơbô̆t glông jơlan mă bruă mơ̆ng Ping gah, Kơnuk kơna lăi hrŏm, amăng anun hmâo Jơnum min pel ĕp tui djơ̆ kơčăo bruă mơ̆ng Grŭp črâo ba mơ̆ng dêh čar klah čun ngă tui tơlơi pơtrun pơsit 18 pơhlôm ha amăng plĕ, pơlir hơbit, rơbô̆t, kơtang, ba glăi bôh thâo, tŭ yua, bôh tơhnal./.