Lăi nao hơnong pơkă, tơlơi anăp nao hăng sa, dua tơlơi črâo trun, hơdră pơtrut pơđĭ kyar lŏn ia rơwang ră anai, Khua git gai Ping gah dêh čar ơi Tô Lâm lăi pơtong amăng hrơi blan rơgao, ƀing ta hơmâo tŭ ư tơlơi yak nao rơnuk phrâo, rơnuk pơđĭ kyar kơtang hloh amăng lŏn ia mơng Jơnum tal 14. Kiăng ngă tui hơdôm hơnong pơkă anai kiăng hơmâo rơnoh pơđĭ kyar GDP 2 mrô tŏ tui na nao amăng sui thun.

Khua git gai Ping gah lăi rơđah: Ƀing apăn bruă prap dưm dăp ngă Ding kơna gơnong glông lêng lĕ ƀing apăn bruă prap lui pơprong mơng Ping gah, anai lĕ ƀing apăn bruă hlăk ai, ƀing mơnuih amra glăm ba bruă lŏn ia amăng hơdôm thun pơ anăp, amăng rơwang yôm phăn mơng rơnuk pơđĭ kyar lŏn ia. Khua git gai Ping gah rơkâo: Ƀing apăn bruă lĕ ƀing dưm dăp ngă Ding kơna gơnong glông ƀuh rơđah tơlơi pơ-ư ang hăng tơlơi gơgrong mơng ƀing gơñu kiăng ƀu pơdơi gir run pơhrăm pô, gir run, hrưn đĭ lăp djơ̆ hăng tơlơi rơkâo bruă jao pơ anăp.