Tlam lơ 4/5 ƀơi ƀôn prong Cần Thơ, Khua git gai Ping gah dêh čar ơi Tô Lâm git gai mông mă bruă hăng Khul apăn bruă Ping gah ƀôn prong Cần Thơ hăng Khul apăn bruă hơdôm boh tơring čar Sóc Trăng hăng Hậu Giang kơ bruă pok pơhai ngă tui hơdôm tơlơi pơtrun, tơlơi klah čun mơng gơnong glông; bruă pơmut hơdôm anih anom gưl tơring čar hăng akŏ pơjing Ping gah ƀôn prong Cần Thơ tơdơi kơ pơmut hrŏm tui tơlơi pơtrun mrô 60 mơng gơnong glông ƀơi 3 boh tơring čar. Khua git gai Ping gah pơsit tong, bruă pơmut hrŏm 3 boh tơring čar jing ƀôn prong Cần Thơ phrâo amra ngă gêh gal kiăng ngă tui bruă pơlir hơbit kjăp kơ kual bơwih ƀong huă, gru grua, mơnuih mơnam, ngă hơbot anih anom, hrưn đĭ ngă bruă klă, tŭ yua amăng wai lăng kơnuk kơna, ngă tui tơlơi dưi tui kual lŏn hăng pơlir tơlơi dưi mơng rĭm boh ƀon lan.

Brơi thâo, thun 2025 lĕ thun yôm phăn biă mă, thun pơgiong bruă pơmut hrŏm gưl tơring čar, kah hăng anai lĕ thun pơphun Jơnum Ping gah djop gưl anăp nao Jơnum tal XIV mơng Ping gah, Khua git gai Ping gah pơtă pơtăn, pioh lu hrơi mông brơi kơ bruă prap lui hăng pơphun truh kih Jơnum Ping gah djop gưl, amăng anun bruă pơjing črăn hră pơ-ar jơnum, kiăng ngă tui klă hăng lăp djơ̆, kiăo tui tơlơi črâo trun mrô 45 mơng Ding jum kơđi čar.