Đĭ pơhiăp amăng mông jơnum, Khua git gai Ping gah dêh čar ơi Tô Lâm pơpŭ hơdôm tơlơi dưi djop mơta mơng abih bang gơnong bruă pơjing Ping gah, mơng gir run pơphô bruă kiăng pơgiong hơdră bruă pơjing, pơplih pơkra amăng Ping gah, ƀudah bruă ruah mơnuih apăn bruă lĕ ƀing apăn bruă akŏ phun thâo rơgơi, đăo gơnang, djơ̆ hăng bruă jao…Khua git gai Ping gah rơkâo, abih bang gơnong bruă pơphun pơjing Ping gah tŏ tui pơphô bruă, ba tơbiă bruă dưm dăp anih anom mă bruă brơi hơbot, mă bruă klă hloh, tŭ yua, amăng anun tơlơi gơgrong mơng ƀing apăn akŏ gưl Ping gah lĕ yôm phăn biă mă.

Lăi nao rơđah hơnong pơkă dưm dăp anih anom mă bruă hơbot lĕ kiăng anih anom mă bruă brơi klă, ƀiă mơnuih samơ̆ ăt dưi pơgiong djop bruă jao, klă hloh, anăp nao tơlơi rơkâo prong hloh lĕ ngă gêh gal hloh brơi anom bơwih ƀong sĭ mơdrô hăng mơnuih ƀôn sang. Khua git gai Ping gah dêh čar ơi Tô Lâm ăt rơkâo, ječ ameč pel ĕp hơdôm tơlơi pơkă mơng Ping gah, pơplih pơkra pơhrua, ba tơbiă hơdôm tơlơi pơkă phrâo bơdjơ̆ nao bruă jao, dưm dăp anih anom, tơlơi rô nao rai amăng bruă mă, tơlơi pơkă bruă mă mơng gưl Ping gah, hơdôm anom bruă pơhlôm brơi mut hrŏm, ha amăng plĕ mơng gơnong glông truh pơ ƀon lan.