Pơ ala kơ khua git gai Ping gah, Kơnuk kơna hmâo jao laih Miđai Rơngai dăp tal Sa kơ Anom bruă kơđi čar Khul ling tơhan mơnuih ƀôn sang dêh čar Việt Nam, Khua git gai Ping gah dêh čar ơi Tô Lâm pơsit yôm bruă mă hăng hơdôm tơlơi gum hơgôp mơ̆ng hơdôm bôh ƀirô kơđi čar, mơnuih apăn bruă kơđi čar, ping gah, mơnuih mă bruă kơđi čar phara lĕ bruă mă mơ̆ng Anom bruă Kơđi čar lơm pơdŏng, kơdŏng pơgang hrưn đĭ, dưi ngă hăng truh kih mơ̆ng khul ling tơhan amăng 80 thun rơgao.

Hrŏm hăng anun, Khua git gai Ping gah dêh čar rơkâo, pơ̆ anăp anai Anom ƀu pơdơi dong ngă tui phiăn juăt klă hiam mơ̆ng djuai ania gah Khul ling tơhan mơnuih ƀôn sang Việt Nam sông kơtang hăng phiăn juăt ư-ang mơ̆ng ƀirô gum hơgôp lăp djơ̆ amăng bruă pơdŏng khul ling tơhan, hơkrŭ đĭ bruă pơgang, wai lăng Lŏn ia Việt Nam djop mơnuih mơnam dưm kơnar amăng rơnuk phrâo./.