Ƀơi sang Đại tướng Võ Nguyên Giáp, jơlan mrô 30 Hoàng Diệu, Hà Nội, Khua git gai Ping gah dêh čar ơi Tô Lâm nao tŭi ñang, dưm guang bơnga, abih pran jua pơpŭ kơ Đại tướng Võ Nguyên Giáp, Khua git gai ling tơhan mơnuih ƀôn sang Việt Nam. Rơbêh 30 thun ngă Khua git gai ling tơhan, Khua git gai Ping gah ling tơhan dêh čar, anăn apăn Đại tướng Võ Nguyên Giáp pơlir hăng hơdôm tơlơi dưi pơprong amăng dua rơnuk blah wang kơdong glăi ayăt Prang hăng Mi, hăng bruă pơjing hăng wai pơgang lŏn ia.

Ping gah, Kơnuk kơna hăng mơnuih ƀôn sang lăng yôm tơlơi gum pơgôp mơng Đại tướng Võ Nguyên Giáp. Djop rơnuk mơnuih apăn bruă, ling tơhan lêng kơ pơpŭ Đại tướng kar hăng ayong tha mơng khul ling tơhan Việt Nam. Ƀơi anih pioh hơdor kơ Đại tướng Văn Tiến Dũng, Khua git gai Ping gah dêh čar ơi Tô Lâm hơmâo tŭi ñang, pơdah pran jua hơdor tơngia hăng Đại tướng Văn Tiến Dũng, Khua ding jum ling tơhan hơđăp, mơnuih hơmâo lu tơlơi pơgôp yôm phăn amăng bruă pơklaih rơngai lŏn ia, pơjing hăng wai pơgang lŏn ia Việt Nam xã hội chủ nghĩa.