Mơguah lơ 20/12, ƀơi Anom Jơnum dêh čar pơ̆ Hà Nội, Grŭp mă bruă Ping gah dêh čar, Khua pơ ala mơnuih ƀôn sang dêh čar, Khua mir sir dêh čar, Jơnum min djop djuai ania mơnuih mơnam dêh čar Việt Nam hăng Ping gah Khul ling tơhan dêh čar, Ding jum Khua ling tơhan dêh čar pơphun yôm phăn ngă lơphet hơdor glăi 80 thun Hrơi pơdŏng Khul ling tơhan mơnuih ƀôn sang dêh čar Việt Nam, 35 thun Hrơi abih bang mơnuih ƀôn sang pơgang dêh čar. Tơlơi pơđok yua kơ Khua git gai Ping gah dêh čar ơi Tô Lâm lăi pơdah amăng mông ngă lơphet hơdor glăi, lăi rơđah: Lơ 22 blan 12 thun 1944, Khul Việt Nam lăi pơhing Tlaih rơngai – phun than pơjing Khul ling tơhan mơnuih ƀôn sang Việt Nam ră anai.

Gah yŭ tơlơi git gai, pơtô juăt, pơhrăm mơ̆ng Ping gah ta hăng Khua mir sir Hồ Chí Minh, Khul ling tơhan ta hmâo pơđĭ kyar tañ, na nao pơjing rai lu bôh than prong. Rôk tui jơlan glông gru grua, Khul ling tơhan lăng yôm pran jua ngă hơkrŭ, ngă phun akha, hrŏm hăng abih bang mơnuih ƀôn sang pơgang tơlơi rơngai, dưi pô, pơlir hơbit hăng pơhlôm đơ đam dêh čar, pơgang Ping gah, pơgang Gong gai, pơgang Mơnuih ƀôn sang hăng rơnuk djop mơnuih dưm kơnar. Ră anai, amăng rơwang hơkrŭ phrâo, Khua git gai Ping gah dêh čar ta lăi rơđah tơlơi pơmin, tơlơi kiăng pơsit pioh Khul ling tơhan mơnuih ƀôn sang ngă giong prong dong djop bruă jao, gum hrŏm abih bang Ping gah, abih bang mơnuih ƀôn sang, abih bang ling tơhan pơjing rai lu bôh than phrâo amăng pơdŏng hăng pơgang lŏn ia djop mơnuih dưm kơnar anun lĕ djă kơjăp hăng kơtưn tơlơi git gai khut khăt, ƀơi anăp amăng djop bruă mơ̆ng Ping gah, tơlơi wai lăng, git gai mơ̆ng Kơnuk kơna pioh kơ Khul ling tơhan mơnuih ƀôn sang hăng bruă hơkrŭ pơgang lŏn ia, rơnuk rơnua plơi pla./.