Khua git gai Ping gah dêh čar ơi Tô Lâm pơsit tong glăi hơdră bruă tơpă sit mơng Ping gah, Kơnuk kơna hăng mơnuih ƀôn sang Việt Nam lêng kơ lăng yôm hăng gir run ngă djop mơta tui tơlơi dưi, hrŏm hăng Ping gah, Kơnuk kơna hăng mơnuih ƀôn sang Cuba anăm pơdơi pok prong hăng ngă dơlăm ƀiă dong tơlơi rô nao rai gum pơgôp gru grua, giang mah yôm phăn hăng ngă hrŏm djop mơta Việt Nam-Cuba, yua kơ tơlơi dưi mơng mơnuih ƀôn sang dua bơnah, yua kơ bruă pơjing dêh čar chủ nghĩa xã hội hăng yua kơ tơlơi rơnuk rơnua, hơđong, ngă hrŏm hăng pơđĭ kyar amăng rŏng lŏn tơnah.

Khua git gai Ping gah dêh čar ơi Tô Lâm lăi glăi hơdôm tơlơi kơđŏm glăi yôm hăng boh than ba glăi amăng tal nao čuă gưl Kơnuk kơna pơ dêh čar Cuba mơng Khua git gai Ping gah, lăi pơtong tơlơi tŭ ư hrŏm mơng Khua mua dua Ping gah, dua kơnuk kơna amăng hơdôm jơlan gah hăng bruă ngă hrŏm phun anun lĕ: Ngă hmua, apui lơtrik, sĭ mơdrô, boh thâo sinh học, laih dong pơtrut ngă hrŏm kjăp amăng hơdôm bruă pơgang rơnuk rơnua, ling tơhan, pơtom hiăp hăng hơdôm tal pơbưp nao rai ngă hrŏm kơplah wah djop gơnong bruă, djop gưl hăng mơnuih ƀôn sang dua bơnah.