Amăng mông bưp, Khua git gai Ping gah dêh čar ơi Tô Lâm pơsit tong Việt Nam lêng kơ lăng Nga lĕ sa amăng hơdôm bơnah prong hloh amăng hơdră pơtom hiăp. Việt Nam čang rơmang tŏ tui tơlơi rô nao rai gru grua hiam klă, djơ̆ hăng tơlơi dưi mơng dua boh dêh čar, pơgôp tŏ tui rơnuk rơnua, ngă hrŏm hăng pơđĭ kyar ƀơi dua kual hăng rŏng lŏn tơnah.

Kiăng tŏ tui hrưn đĭ ba glăi boh tŭ yua mơng ngă hrŏm dua bơnah, sit biă ñu amăng thun 2025 ƀrô tal hơdor glăi 75 thun akŏ pơjing tơlơi rô nao rai pơtom hiăp, Khua git gai Ping gah dêh čar ơi Tô Lâm rơkâo dua bơnah tŏ tui kơtưn pơbưp nao rai khua mua pơprong; ngă hrŏm kjăp amăng hơdôm khul grup; pok pơhai tŭ yua tơlơi pơkôl sĭ mơdrô rơngai Việt Nam-Khul pơlir hơbit bơwih ƀong huă Asia-Mi kô̆; pơsit tong hơdôm jơlan gah, hơdră bruă hăng akŏ bruă ngă hrŏm phrâo amăng hơdôm bruă ling tơhan, boh thâo phrâo, apui yua, apui lơtrik ayuh, boh thâo ia rơgơi, gru grua adôh suang.