Prăp lui kơ Jơnum Ping gah đơ đam dêh čar tal 14 pơkă hlâo pơphun amăng blan 1/2026 amăng mông Jơnum tal 8 Grŭp mă bruă Ping gah dêh čar ta tal 13 phrâo anai hmâo pơsit pơdŏng 5 grŭp anet, amăng anun hmâo Grŭp čih hră pơ-ar jơnum. Grŭp čih hră pơ-ar jơnum hmâo bruă prăp lui Tơlơi lăi pơthâo glăi bruă kơđi čar hăng Lăi pơthâo glăi klah čun 40 thun pơplih phrâo lăi pơthâo amăng mông Jơnum 14 mơ̆ng Ping gah.

Kiăng djru bruă kơ Grŭp čih hră jơnum, Grŭp mă bruă Ping gah ăt hmâo pơsit pơdŏng laih Grŭp dăp hơdră čih hră pơ-ar, truh ră anai, Grŭp hmâo bơkơtuai, gum pơhiăp laih, phun ñu tŭ ư hăng bôh yôm Pơkă, Jơlan hơdră, Kơčăo bruă mă hăng tơlơi pơpha bruă mơ̆ng Grŭp dăp hơdră... Pơhiăp amăng mông jơnum, Khua git gai Ping gah dêh čar ta Nguyễn Phú Trọng lăi rơđah, Jơnum khua pơ ala đơ đam dêh čar tal 14 mơ̆ng Ping gah lĕ sa bruă jơnum kơđi čar yôm phăn, amra jing sa gru pơđom pioh yôm phăn ƀơi jơlan pơđĭ kyar mơ̆ng lŏn ia ta. Khua git gai Ping gah dêh čar ta Nguyễn Phú Trọng lăi rơđah, bruă prăp lui hơdôm hră pơ-ar kơ Jơnum tal 14 mơ̆ng Ping gah dêh čar, amăng anun Tơlơi lăi pơthâo glăi bruă kơđi čar lĕ tơlơi lăi pơthâo glăi phun, hmâo bruă pơsit jơlan gah kơ hơdôm hră pơ-ar pơkon mơ̆ng Jơnum yua anun khom pơphun klă, tơpă, pơplih phrâo amăng hơdră ngă, khom pơhlôm sit nik klă, lăi nao djop bôh nik pơplih phrâo mơ̆ng lŏn ia, pơhlôm tơlơi truh kih mơ̆ng Jơnum./.