VOV4.Jarai - Čơtlăm lơ 31/3, ƀơi Ƀirô mă bruă Ping gah dêh čar ta, Khua git gai Ping gah dêh čar ta ơi Nguyễn Phú Trọng hmâo iâu telephone bơkơtuai gưl dlông hăng Khua dêh čar Đức, Khua git gai Ping gah Dân chủ Xã hội Đức Olaf Schoz. Amăng mông bơkơtuai, ơi Olaf Schoz hơ-ư̆č hmưi truh kih mơng Việt Nam hăng pơđĭ kyar lŏn ia, pơđĭ dlông bruă mă hăng gơgrong jar kơmar hăng pơsit tơlơi lăng yôm mơng Đức pioh kơ tơlơi rô nao rai gum hrom bruă Đức hăng Việt Nam glăk pơđĭ kyar klă hiam, hmâo lu tơhnal gal kiăng pơđĭ kyar kơtang dong.

Đơ đam anih bơkơtuai

Dua gơñu hmâo tŭ ư amra črâo ba bruă pơtrut gum hrom amăng bruă mă dua bôh dêh čar hơdai bơ đing nao pơ̆ anăp anai. Gah tơlơi Ia Rơsĭ Ngŏ, dua bôh dêh čar tŭ ư kơ tơlơi kiăng hloh mơng bruă djă pioh rơnuk rơnua, hơđong, gum hrom, pơđĭ kyar hăng pơpŭ tơlơi phiăn jar kơmar, amăng anun hmâo Tơlơi pơkôl thun 1982 mơng Sang gum hơbit djop dêh čar gah Tơlơi phiăn ia rơsĭ. Gah tơlơi anai, Khua git gai Ping gah dêh čar ta ơi Nguyễn Phú Trọng pơsit hơdră pơtrun tŭ ư hrom mơng Việt Nam lĕ pơpŭ hơdôm tơlơi pơkă phun mơng Sang gum hơbit djop dêh čar, čang rơmang hơdôm bơnah bơdjơ̆ nao pơtrut bruă bơkơtuai kiăng pơđut kơđi tơlơi, pơjing glăi tơlơi hơđong hluai tui tơlơi pơpŭ tŭ yua lăp djơ̆ mơng hơdôm bơnah, djơ̆ hăng tơlơi phiăn jar kơmar./.  

Siu H’ Prăk: Pơblang