Sa thun rơgao, hơdôm Grŭp črâo ba gưl tơring čar hmâo ƀơi anăp pơphun giăm truh 150 mơta bruă pel ĕp, lăng tui bruă pơgang, pơgăn hưp ƀong kông ngăn, tơlơi ngă soh. Rơgao kơ pel ĕp, lăng tui hmâo ƀuh lu tơlơi ngă soh; rơkâo pơsir lu khul ping gah, mơnuih ping gah ngă soh. Kơnong amăng sa thun, hơdôm Grŭp črâo ba gưl tơring čar hmâo pel ĕp glăi, ba 600 mơta kơđi tơlơi hưp ƀong kông ngăn, ngă soh amăng mơta lăng tui, črâo ba kiăng đing nao git gai pơsir.

Lu anih anom hmâo thâo, tơgŭ kơđi, pel ĕp pơsir lu kơđi tơlơi prong, lu mơnuih apăn bruă gah Grŭp apăn bruă Ping gah tơring čar, ƀôn prong wai lăng. Tơdơi kơ črâo rơđah 5 bôh than ba truh hăng tơlơi kiăng lăng nao ba tơbiă pioh pơđĭ tui dong bôh tơhnal mă bruă mơng Grŭp črâo ba gưl tơring čar pơ̆ anăp anai, Khua git gai Ping gah dêh čar ta, ơi Nguyễn Phú Trọng rơkâo, Grŭp črâo ba hơdôm tơring čar, ƀôn prong khom lăi pơthâo abih, thâo dơlăm hloh dong kơ anih dŏng, bruă mă, bruă apăn, bruă jao, tơlơi dưi mơng Grŭp črâo ba gưl tơring čar; khom mă bruă hmâo akô̆ tlôn, sit nik, tui djơ̆ bruă mă, bruă jao./.