VOV4.Jarai - Čơtlăm lơ 8/7, ƀơi ƀirô mă bruă Ping gah dêh čar ta, gah yŭ tơlơi git gai mơng Khua git gai Ping gah dêh čar ta ơi Nguyễn Phú Trọng, Ding jum kơđi čar, Grŭp git gai Ping gah hmâo jơnum laih, pel ĕp hơdôm tơlơi ƀuh rơđah mơng lŏn ia, tơlơi jar kơmar amăng 3 blan tal 2 hăng 6 blan akô̆ thun 2022; bruă mă phun pơ̆ anăp anai.

Ding jum kơđi čar, Grŭp git gai Ping gah pơsit, hơdôm hrơi pơ̆ anăp dêh čar ta bŏng glăi dong hăng lu tơlơi tơnap, tơlơi lông, amra ngă kaih bruă hơkrŭ glăi bơwih ƀong hăng pơđĭ kyar bơwih ƀong mơnuih mơnam yua kơ tơlơi pơplih tơnap him lăng mơng bruă bơwih ƀong – bruă kơđi čar ƀơi rŏng lŏn tơnah, tơlơi rung răng kơplah wah Nga – Ukraine ngă tơnap; tơlơi blah ngă kơplah wah hơdôm bôh dêh čar pơprong jai hrơi kơtang tui; tơlơi đĭ nua gơnam, nua ia jâu ia xăng, jơlan gah ngă ƀiă hĭ hơdră gum djru prăk kak ƀơi lu bôh dêh čar, bruă pơhlôm pel ĕp, pơjrao tơlơi duam ruă hăng bơwih brơi tơlơi suaih pral kơ mơnuih ƀôn sang. Ding jum kơđi čar, Grŭp git gai Ping gah rơkâo hơdôm gưl, hơdôm gơnong bruă, khul gum pơhrăm, lăi pơthâo abih, lăi pơhing hyu hăng pok pơhai ngă tui hmao tlôn, ba glăi bôh tơhnal hơdôm tơlơi pơtrun pơsit bruă Jơnum tal 5 Grŭp mă bruă Ping gah dêh čar tal 13./.

Siu H’ Prăk: Pơblang