VOV4.Jarai - Mơguah lơ 8/2, ƀơi Ƀirô mă bruă Ping gah dêh čar, Khua git gai Ping gah dêh čar ta ơi Nguyễn Phú Trọng git gai bruă jơnum Grŭp mă bruă Ping gah pơsit tơlơi ngă tui Tơlơi črâo ba  mơng Grŭp mă bruă Ping gah kơ pơphun Tết Nhâm Dần 2022 hăng Tơlơi črâo ba mơng Khua dêh čar kơ bruă kơtưn hơdôm bruă pơhlôm čơkă Tết tui phiăn juăt Nhân Dần 2022 mơ-ak klă, tâ̆o hiam, pơhlôm, pơkrem.

Ƀing khua mua git gai Ping gah, Kơnuk kơna hmâo nao čuă, hơ-ư̆č hmưi Tết ƀơi 63 bôh tơring čar, ƀôn prong, ƀơk gơnam tam kơ hơdôm mơnuih gah hơdră bruă, mơnuih mă bruă ƀu hmâo glăi plơi ƀong Tết; hyu čuă, hơ-ư̆č hmưi Tết hơdôm bôh să, plơi pla guai lŏn ia, puih kơđông ling tơhan, hơdôm khul mă bruă pơgang pơgăn klin Covid-19, dô̆ gak mă bruă amăng hơdôm hrơi tết. Klah čun bruă Jơnum, Khua git gai Ping gah dêh čar ta ơi Nguyễn Phú Trọng lăi rơđah, tơdơi kơ tal pơdơi Tết, hơdôm bôh ƀirô, anom bruă khom đing nao ngă tui mơtăm hơdôm bruă kơđi čar, tañ ba hơdôm bruă mă pơwot glăi kah hăng hlâo, pơhlôm bruă mă klă hruaih, djru klă tơlơi kiăng mơng mơnuih ƀôn sang; ƀu pioh hmâo tơlơi ƀong Tết sui hrơi, lui raih bruă mă, ngă bơdjơ̆ nao bruă bơwih ƀong huă, sĭ mơdrô mơng mơnuih ƀôn sang hăng anom bơwih ƀong./.

Siu H’ Prăk: Pơblang