VOV4.Jarai - Lơ 13/9, ƀơi Ƀirô mă bruă Ping gah dêh čar, Khua git gai Ping gah dêh čar ta ơi Nguyễn Phú Trọng tŭ jum Khua git gai Ping gah mơnuih ƀôn sang Kur, Khua git gai wai lăng pơ ala mơnuih ƀôn sang dêh čar Kur, ơi Samdech Heng Samrin glăk dô̆ čuă dêh čar Việt Nam. Amăng mông tŭ jum, Khua git gai Ping gah dêh čar ta ơi Nguyễn Phú Trọng pơsit tơlơi rô nao rai gum hrom kơplah wah dua Ping gah, dua Kơnuk kơna hăng mơnuih ƀôn sang dua bôh dêh čar jai hrơi jai pơđĭ kyar dơlăm hloh, sit nik hăng ba glăi bôh tơhnal, ba glăi bôh tŭ yua sit nik kơ mơnuih ƀôn sang rim bôh dêh čar.

Khua git gai Ping gah dêh čar ta ơi Nguyễn Phú Trọng pơsit Ping gah, Kơnuk kơna hăng mơnuih ƀôn sang dêh čar Việt Nam dŏng yua na nao bruă pơdŏng hăng pơđĭ kyar lŏn ia Kur, bơni tơlơi dŏng yua, gum djru yôm phăn mơ̆ Kur hmâo pioh kơ Việt Nam mơng hlâo truh kơ ră anai. Khua git gai Ping gah dêh čar ta lăi rơđah, phiăn juăt hăng tơhnal yôm phăn mơng tơlơi rô nao rai kơplah wah 3 bôh dêh čar Việt Nam – Lao – Kur hăng čang rơmang 3 bôh dêh čar gum hrom djă pioh, bư̆ bôr kơ tơlơi rô nao rai 3 bôh dêh čar jai hrơi jai pơđĭ kyar, yua kơ tơlơi pơdrong asah mơng rim bôh dêh čar, yua kơ tơlơi rơnuk rơnua, hơđong, gum hrom hăng pơđĭ kyar ƀơi kual hăng rŏng lŏn tơnah./.

Siu H’ Prăk: Pơblang