VOV4.Jarai - Čơtlăm lơ 20/4, Khua git gai Ping gah dêh čar ta ơi Nguyễn Phú Trọng hmâo tŭ jum Khua git gai wai lăng pơ ala mơnuih ƀôn sang gơnong yŭ dêh čar India Om Birla.

Đơ đam anih tŭ jum mơng Khua git gai Ping gah ơi Nguyễn Phú Trọng

Khua git gai Ping gah dêh čar ta ơi Nguyễn Phú Trọng bơni Khua git gai wai lăng pơ ala mơnuih ƀôn sang gơnong yŭ dêh čar India Om Birla hăng Grŭp Khua pơ ala mơnuih ƀôn sang dêh čar India rai čuă dêh čar Việt Nam, pơsit yôm tơlơi pơđĭ kyar klă hiam mơng bruă rô nao rai dua bôh dêh čar, hăng lăi, tal rai čuă Việt Nam mơng Khua git gai wai lăng pơ ala mơnuih ƀôn sang gơnong yŭ dêh čar India tal anai hmâo bôh yôm phăn biă, biă ñu amăng tơlơi dua bôh dêh čar hơdor glăi 50 thun hrơi pơdŏng bruă pơtom hiăp amăng thun anai, djru ngă kơjăp hăng kơtưn đĭ bruă gum hrom abih bang kơplah wah dua bôh dêh čar. Khua git gai Ping gah dêh čar ta ơi Nguyễn Phú Trọng tŭ ư hăng hơdôm tơlơi rơkâo pơtrut gum hrom mơng Khua git gai wai lăng pơ ala mơnuih ƀôn sang gơnong yŭ dêh čar India, rơkâo dua bơnah pơ̆ anăp anai gum hrom hăng lăi pơthâo tơlơi găn rơgao kiăng ngă dơlăm hloh dong tơlơi rô nao rai gum hrom abih bang. Khua git gai Ping gah dêh čar ta ăt rơkâo mơn dua bơnah bơkơtuai, gum hrom lăi pơthâo hăng gum hrom kơjăp amăng hơdôm mông bơkơtuai bruă Khua pơ ala mơnuih ƀôn sang jar kơmar./.

Siu H’ Prăk: Pơblang