Ƀrô djơ̆ tal hơdor glăi 10 thun pơdŏng Grŭp Khua pơ ala mơnuih ƀôn sang hlăk ai Việt Nam (mơ̆ng thun 2015-2025), čơtlăm lơ 24/6, ƀơi Ƀirô mă bruă Ping gah dêh čar ta, Khua git gai Ping gah dêh čar ơi Tô Lâm hmâo bưp laih ƀô̆ mơta Grŭp khua pơ ala mơnuih ƀôn sang hlăk ai dêh čar tal 15. Khua git gai Ping gah dêh čar lăi rơđah, Jơnum Ping gah hơdôm gưl anăp nao Jơnum khua pơ ala đơ đam dêh čar tal 14 mơ̆ng Ping gah, jing bruă jao hmâo bôh tŭ yua djop pran - tơhnal - bôh thâo ia rơgơi kơ rơwang phrâo.

Khul khua pơ ala mơnuih ƀôn sang hlăk ai dêh čar khom gum pơhiăp amăng hơdôm hră čih pơkra hră pơ-ar, lăi nao bôh nik ñu hăng ba tơbiă hơdôm tơlơi pơplih phrâo khom hmâo kơ hơdră pơđĭ kyar, wai lăng bruă hrŏm, pơđĭ kyar kơjăp, rơnuk rơnua mơ̆ng hlâo. Kiăng dưi ngă tui bruă mă prong mơ̆ng pô, Khua git gai Ping gah dêh čar lăi rơđah, rim khua pơ ala mơnuih ƀôn sang hlăk ai khom lăng glăi drơi pô, pơhrăm pô, hrăm tui hăng tuh rơyuh pran jua ƀu pơdơi. Ƀing khua pơ ala mơnuih ƀôn sang Hlăk ai khom pơsit tơpă bruă hơkrŭ, ha pran jua hăng Ping gah, hăng Lŏn ia hăng mơnuih ƀôn sang; ngă tui bruă mă, bang hyu pran jua pơplih phrâo, ƀu sư̆ rơbư̆ ƀơi anăp tơlơi tơnap, ƀu pơplih yua kơ bôh tŭ yua kơ pô, ƀu ngă rơngiă pô ƀơi anăp anô̆ ngă pơhưč mơ̆ng bruă ngă khua ƀudah anăn păn hmư̆ hing; khin pơmin, khin ngă, khin pơplih phrâo, khin gơgrong bruă./.